ICON COMMUNICATIONS-Ը 2010 Թ.-ԻՆ ՉԻ ԱԿՆԿԱԼՈՒՄ ԻՆՏԵՐՆԵՏԻ ԳՆԵՐԻ ԶԳԱԼԻ ԻՋԵՑՈՒՄ. ԳՈՐԾԱԴԻՐ ՏՆՕՐԵՆ
ԵՐԵՎԱՆ, 2 մարտի. /ԱՌԿԱ/. 2010 թ.-ին Ինտերնետի գների զգալի իջեցում չի լինի, սակայն դրա որակը զգալիորեն կլավանա, «ԱՌԿԱ» գործակալությանը տված հարցազրույցումա ասաց iCON Communications-ի գործադիր տնօրեն Րաֆֆի Քասարջյանը:
«Փրովայդերները որոշակի ֆիքսված ծախսեր ունեն, առանց որոնց նրանց չեն կարող Ինտերնետը հաճախորդներին հասցնել, այդ իսկ պատճառով գների իջեցման մասին խոսելն անիմաստ է»,- նշեց նա:
Հղում անելով միջազգային փորձին՝ Քասարջյանը պարզաբանեց, որ ոլորտի զարգացումը ենթադրում է ոչ թե գների իջեցում, այլ մեծ քանակությամբ կամ լավ որակի ծառայությունների ստացում միևնույն գնով:
Միևնույն ժամանակ նա նշեց, որ չնայած ճգնաժամին՝ վերջին տարում Ինտերնետի սպառման ծավալները Հայաստանում աճում են, շուկայում մեծանում է մրցակցությունը և որպես հետևանք՝ Ինտերնետի գները ավելի մատչելի են դառնում:
iCON Communications-ը լայնաշերտ Ինտերնետ ծառայության առաջատար մատակարար է Հայաստանում, որը ջանում է ապահովել լավագույն տեխնիկական կատարողականություն ու հաճախորդների սպասարկում: Գրանցվելով 2007թ.-ի վերջին` iCON-ը սկսեց մատուցել բարձր որակի ինտերնետ ծառայություն 2009թ. մարտին:
iCON-ի ցանցը տվյալ պահին ծածկում է 70 ք.կմ տարածք՝ ներառյալ հետևյալ շրջանները՝ Կենտրոն, Արաբկիր, Աջափնյակ, Վահագնի թաղամաս, Քասախ գյուղ, Զեթուն, Կայարան, Նոր Նորքի 2-8 զանգվածները և Ավան: iCON-ը շարունակում է ընդլայնել իր ցանցը դեպի Երևանի մյուս շրջաններ և Հայաստանի մարզեր: -0-
Ծանոթացեք լուրերին առաջինն ու քննարկեք դրանք մեր Telegram-ում
01:34 03.03.2010