ՀԱՅԱՍՏԱՆՈՒՄ ԿՄԵԾԱՆԱ ԷԼԵԿՏՐՈՆԱՅԻՆ ԳՐՔԻ ՀԱՆՐԱՃԱՆԱՉՈՒԹՅՈՒՆԸ

Armenianhouse.org հայկական էլեկտրոնային գրադարանի տնօրեն Կարեն Վրթանեսյանի բացառիկ հարցազրույցը՝ «ԱՌԿԱ» գործակալությանը

«ԱՌԿԱ». Բազմահատոր էլեկտրոնային գրքերը որքա՞ն են պահանջված բլոգերի և սոցիալական ցանցերի դարում:

Կ. Վրթանեսյան. Իսկապես, մեր դարում ամեն ինչ արագացվում է, տեղեկատվության հոսքերն ավելանում են: Ամեն օր ինտերնետում դրվում է տեքստերի, տեսանյութերի և այլ տեղեկատվության հսկայական քանակություն, և թվում է՝ բազմահատոր դասական գրքերի ընթերցումն արդեն անցյալում է: Մասամբ դա այդպես է, քանի որ երբ մարդը ընթերցում է էկրանից, նա փորձում է առավելագույն ժամանակ խնայել, հասկանալ տեքստի ողջ իմաստը՝ անցնելով պարբերությունից պարբերություն:

Մյուս կողմից, ավելի լուրջ տեղեկատվության պահանջարկ, ամեն դեպքում, կա, թեպետ նվազում է: Ստիպված, թե ինքնակամ՝ մարդիկ դեռ գրքեր ընթերցում են:

Գիտատեխնիկական առաջընթացի ներկա տեմպերի դեպքում դժվար է կռահել, թե ինչ տեղի կունենա մի քանի տասնամյակներ անց, սակայն կարելի է կանխատեսել, որ թղթային գրքերի թիվը կկրճատվի: Արդեն այսօր բոլոր հրատարակությունները թղթայինների հետ միասին թողարկում են նաև գրքերի էլեկտրոնային տարբերակները, եզակի բացառությամբ:

«ԱՌԿԱ». Ե՞րբ և ու՞մ նախաձեռնությամբ է ստեղծվել Armenianhouse.org գրադարանը:

Կ. Վրթանեսյան. Գրադարանը հիմնադրվել է 2001թ.-ին: Ես և կինս այդ ժամանակ արտասահմանում էինք և ինտերնետում հայկական գրականության, պատմության, «հայկական թեժ թեմաների» խիստ կարիք ունեինք, այդ պատճառով էլ որոշեցինք հայկական էլեկտրոնային գրադարան ստեղծել:

«ԱՌԿԱ». Ինչպիսի՞ն է Armenianhouse.org կայքի հաճախելիությունը, ունե՞ք տեղեկատվություն ընթերցողների նախապատվության մասին:

Կ. Վրթանեսյան. Օրական կայք է այցելում 2-2,5 հազար մարդ: Հիմնական այցելուները ԱՄՆ-ից, Ռուսաստանից, Եվրոպայից, Հայաստանից են: Հազվադեպ կայք են հաճախում Թուրքիայից և Ադրբեջանից: Ընթերցողների տարիքային դիապազոնը շատ լայն է՝ դեռահասներից մինչև թոշակառուներ: Այսօրվա դրությամբ մեզ մոտ ամենահանրաճանաչ հեղինակը Լեոնիդ Ենգիբարովն է:

Նման ռեսուրսը շատ հարմար է, առաջին հերթին տանը աշխատող մարդկանց համար: Էլեկտրոնային գրադարանի հարմարությունը կայանում է նրանում, որ եթե գրադարանում կարելի է միաժամանակ վերցնել առավելագույնը երեք-չորս գիրք և հաճախ անհրաժեշտություն է առաջանում ինչ-որ բան ձեռքով արտագրել, ապա էլեկտրոնային տարբերակում նման խնդիր չկա: Էլեկտրոնային գրադարանից շատ հարմար է օգտվել ուսանողներին, գիտնականներին:

«ԱՌԿԱ». Ի՞նչ թեմատիկ ուղղվածություն ունի գրադարանը: Ո՞ր լեզուներով է հրապարակվում գրականությունը:

Կ. Վրթանեսյան. Կայքը հիմնականում հայկական ուղղվածություն ունի: Սակայն մենք ունենք գրքեր նաև տարածաշրջանի երկրների պատմության մասին: Կա ինչպես գեղարվեստական գրականություն՝ մեծ վեպերից մինչև վիպակներ և պատմվածքներ, այնպես էլ գիտական գրականություն՝ մեծ աշխատություններից մինչև հոդվածներ: Մենք սկսել ենք կայքի ռուսալեզու տարբերակից, քանի որ հայկական գրքերի թվայնացման հետ կապված տեխնիկական խնդիրներ էին առաջացել: Այնուհետև հայտնվեցին կայքի հայերեն և անգլերեն տարբերակները: Բացի այդ ռեսուրսից օգտվում են սփյուռքահայերը, որոնց համար դժվար է գտնել հայկական գրականություն: Խոսքը գիտական և գեղարվեստական, մասնավորապես մանկական գրականության մասին է:

«ԱՌԿԱ». Ի՞նչ հաճախականությամբ է թարմացվում գրադարանը:

Կ. Վրթանեսյան. Քանի որ մեր նախագիծը ստեղծվել է կամավորների կողմից և կոմերցիոն շահ չի հետապնդում, ստիպված ենք հաշվի նստել այն հանգամանքի հետ, որ ոչ միշտ են կայքի ստեղծողներն ազատ ժամանակ ունենում նոր նյութերը թվայնացնելու և կայքում տեղադրելու համար: Ավելին՝ գրադարանի վրա իրականացվող աշխատանքը շատ աշխատատար է, հատկապես հայերեն գրքերի թվայնացման գործընթացը: Հաճախ մեզ ուղարկում են արդեն թվայնացված նյութեր, սակայն աշխատանքը համակարգված չէ: Անկեղծ ասաց ես նույնիսկ չգիտեմ, թե գրադարանում այժմ որքան հեղինակ և գիրք է ներկայացված:

«ԱՌԿԱ». Գործու՞մ են, արդյոք, Հայաստանում այլ էլեկտրոնային գրադարաններ:

Կ. Վրթանեսյան. Այո, կան նաև այլ էլեկտրոնային գրադարաններ, որոնք հիմնականում ունեն տարբեր թեմատիկ ուղղվածություններ: Դրանցից ոմանք կենտրոնացված են բացառապես դասական գրականության վրա, մյուսները՝ նեղ մասնագիտական են: Մեր ռեսուրսն ավելի համապարփակ է:

«ԱՌԿԱ». Ո՞րն է, ըստ ձեզ,  էլեկտրոնային գրքերի ընթերցման համար նախատեսված սարքավորումների ապագան: Կդառնա՞ն, արդյոք, դրանք հանրաճանաչ Հայաստանում:

Կ. Վրթանեսյան. Կարծում եմ, որ դրանց հանրաճանաչությունը կաճի: Հատկապես, երբ շուկա կհանվեն Հարավարևելյան Ասիայում արտադրված Amazon Kindle կամ Apple iPad սարքավորումների համեմատաբար էժան փոխնակները:-0-

Ծանոթացեք լուրերին առաջինն ու քննարկեք դրանք մեր Telegram-ում

17:32 25.03.2010