Հայաստանում անհրաժեշտ է ՏՏ ոլորտի զարգացման միասնական ծրագիր մշակել. ռուս փորձագետ
ԵՐԵՎԱՆ, 2 ապրիլի. /ԱՌԿԱ/. Հայաստանում անհրաժեշտ է ՏՏ ոլորտի զարգացման միասնական ծրագիր մշակել, կարծում է հայտնի ռուս տնտեսագետ, Ռուսաստանի գիտությունների ակադեմիայի ակադեմիկոս, Հայաստանի ԳԱԱ պատվավոր ակադեմիկոս Աբել Աղանբեկյանը:
«ՏՏ ոլորտի զարգացումը չափազանց կարևոր է Հայաստանի համար: Այս ոլորտում մեծ ներուժ, պրոֆեսիոնալ մասնագետներ կան: Սակայն բոլոր այդ ուժերը ցրված են, նրանք աջակցություն չեն ստանում, չի իրականացվում կադրերի նպատակային նախապատրաստում», - ասել է Աղանբեկյանը հինգշաբթի «Ռուսաստանի տնտեսությունը ճամփաբաժնին: Հետճգնաժամային տարածքի ընտրությունը» գրքի շնորհանդեսի ժամանակ::
Նրա խոսքերով՝ երկրում անհրաժեշտ է մշակել ՏՏ ոլորտի զարգացման ծրագիր, ստեղծել միասնական պետական մարմին, նշանակել ոլորտի համակարգող:
Աղանբեկյանը նշել է, որ Հայաստանի համար հսկայական նշանակություն ունի նաև զբոսաշրջության ոլորտի զարգացումը, որը երկրում զարգանում էր ծրագրային-նպատակային քաղաքականությամբ: Ռուս փորձագետի խոսքերով՝ այս բնագավառում մեծ հաջողություններ են ձեռք բերվել մեծամասամբ այն բանի շնորհիվ, որ էկոնոմիկայի նախարարությունում այս ոլորտի համար պատասխանատու է փոխնախարարը, ստեղծվել է միջազգային կարգի տուրիստական կազմակերպություն:
«Ռուսաստանում տուրիստական հոսքերի մեծ աճ չի գրանցվում, իսկ Հայաստանին դա հաջողվել է: Անհրաժեշտ է զարգացնել հաջողությունը», - կարծում է նա:-0-
Ծանոթացեք լուրերին առաջինն ու քննարկեք դրանք մեր Telegram-ում
18:44 02.04.2010