ԻՆՏԵՐՆԵՏԸ ՀԱՅԱՍՏԱՆՈՒՄ ՎԵՐՋԻՆ ՏԱՐԻՆԵՐԻՆ ԱՎԵԼԻ ԻՆՏԵՆՍԻՎ Է ԶԱՐԳԱՆՈՒՄ, ՔԱՆ ՏԱՐԱԾԱՇՐՋԱՆԻ ԵՐԿՐՆԵՐՈՒՄ
ԵՐԵՎԱՆ, 9 ապրիլի. /ԱՌԿԱ/. Ինտերնետը Հայաստանում վերջին տարիներին ավելի ինտենսիվ է զարգանում, քան տարածաշրջանի երկրներում, «ԱՌԿԱ» գործակալությանը տված հարցազրույցում հայտարարեց «Կոռնետ- АМ» ընկերության գլխավոր տնօրեն Բորիս Դեմիրխանյանը։
Նա նշեց, որ Հայաստանը տարածաշրջանում Ինտերնետ-ծառայությունների որակի և գնային առաջարկի տեսանկյունից առաջատար դիրքերում չէ, քանի որ ներքին ենթակառուցվածքների իրական զարգացումը երկրում սկսվել է մեկ-երկու տարի առաջ։
Ավելի վաղ, ինչպես նշեց ընկերության ղեկավարը, հայկական շուկայում գոյություն ունեին զարգացմանը խոչընդոտող բազմաթիվ գործոններ, այդ թվում՝ հեռահաղորդակցական ոլորտի մի շարք ծառայությունների մենաշնորհների առկայություն, օպտիկամանրաթելային կապուղիների բացակայություն։
«Սակայն այդ հարցերի կարգավորումից հետո իրականացվում է ոլորտի առավել ինտենսիվ զարգացում, քան տարածաշրջանի այլ երկրներում՝ ավելի ժամանակակից տեխնոլոգիաների ներդրման հաշվին»,- ասաց Դեմիրխանյանը։
Նրա խոսքերով՝ ոլորտի զարգացմանը մեծապես նպաստել է նաև օրենսդրական դաշտի բարելավումը և ոլորտի կարգավորումը Հանրային ծառայությունները կարգավորող հանձնաժողովի կողմից:
ՀԾԿՀ տվյալների համաձայն՝ Հայաստանում լայնաշերտ հասանելության բաժանորդների թիվը հունվարի 1-ի դրությամբ 70-75 հազար է կազմել, dial-up բաժանորդներինը՝ 40-45 հազար, GPRS ցանցինը՝ 1,5 միլիոն:
Հայաստանի ինտերնետի արտաքին ուղիների թողունակությունը 2010թ.-ին, ՀԾԿՀ կանխատեսումներով, կաճի կրկնակի և կկազմի 6,5-7գիգաբիթ/վրկ: 2009թ. արդյունքներով՝ այդ ցուցանիշը կազմել է 3,7գիգաբիթ/վրկ:--0--
Ծանոթացեք լուրերին առաջինն ու քննարկեք դրանք մեր Telegram-ում
16:55 09.04.2010