«ԱՐՄԵՆՏԵԼ» ԸՆԿԵՐՈՒԹՅԱՆԸ ՄԵՆԱՇՆՈՐՀԱՅԻՆ ԿԱՐԳԱՎԻՃԱԿ ՏՐԱՄԱԴՐԵԼԸ ՍԽԱԼ ԷՐ. ՀԾԿՀ ՆԱԽԱԳԱՀ
ԵՐԵՎԱՆ, 9 ապրիլի. /ԱՌԿԱ/. «ԱրմենՏել» ընկերությանը բջջային, ամրակցված կապի և մեծածախ ինտերնետ ծառայությունների տրամադրման մենաշնորհային իրավունքի շնորհումը սխալմունք էր, և միայն այդ կարգավիճակի վերացումից հետո հաջողվեց հասնել այդ ոլորտի աճի, չորեքշաբթի հայտարարեց ՀՀ հանրային ծառայությունները կարգավորող հանձնաժողովի նախագահ Ռոբերտ Նազարյանը:
«Մենք մինչ այդ մեկ սխալ էինք թույլ տվել, որի պատճառով տուժում էինք երկար տարիների ընթացքում: Դա «ԱրմենՏել» ազգային օպերատորի մենաշնորհային կարգավիճակն էր: Ընկերությանը բացառիկ իրավունքներ էին վերապահվել, ինչը թույլ չէր տալիս մեզ ազատականացնել շուկան, ընդունել ոլորտը կարգավորող օրենսդրական ակտեր», - ասել է նա կլոր սեղանի ընթացքում, որին մասնակցել են կապի, հեռահաղորդակցության և տեղեկատվական տեխնոլոգիաների ոլորտի ներկայացուցիչները:
«ԱրմենՏել» ընկերությունը 1991-2006 թթ.-ին Հայաստանում բջջային, ամրակցված կապի և մեծածախ ինտերնետ ծառայությունների տրամադրման մենաշնորհային իրավունք ուներ: 2006 թ.-ին ընկերությունն ինքնակամ հրաժարվեց իր մենաշնորհային իրավունքներից, ինչը թույլ տվեց ազատականացնել շուկան:
Հայաստանում այժմ գործում է բջջային կապի երեք օպերատոր՝ «ԱրմենՏել» ՓԲԸ-ն (ապրանքանիշը՝ «Beeline»), որը «ՎիմպելԿոմ» ԲԲԸ-ի հարյուրտոկոսանոց դուստր ընկերությունն է, VivaCell-MTS-ը («Ղ-Տելեկոմ »ՓԲԸ) և «Orange Armenia»-ն (France Telecom ընկերության հարյուրտոկոսանոց դուստրը, ապրանքանիշը՝ Orange), ինչպես նաև մեծածախ ինտերնետի երեք օպերատոր՝ «ԱրմենՏել» հեռահաղորդակցական ընկերությունը (ապրանքանիշը՝ «Beeline»), FiberNet Communicationsը և GNC Alfa-ն: -0-
Ծանոթացեք լուրերին առաջինն ու քննարկեք դրանք մեր Telegram-ում
18:08 09.04.2010