SYNOPSYS-Ի ԿՈՂՄԻՑ VIRAGE LOGIC-Ի ԳՆՈՒՄԸ ԹՈՒՅԼ ԿՏԱ ԱՄՐԱՊՆԴԵԼ ԸՆԿԵՐՈՒԹՅԱՆ ԴԻՐՔԵՐԸ ՀԱՄԱՇԽԱՐՀԱՅԻՆ ՇՈՒԿԱՅՈՒՄ. ՓՈՐՁԱԳԵՏ
ԵՐԵՎԱՆ, 14 հունիսի. /ԱՌԿԱ/. Synopsys-ի կողմից Virage Logic-ի գնումը թույլ կտա ամրապնդել ընկերության դիրքերը համաշխարհային շուկայում, երկուշաբթի լրագրողներին ասաց Տեղեկատվական տեխնոլոգիաների ձեռնարկությունների միության (UITE) տնօրեն Կարեն Վարդանյանը
Հունիսի 11-ին Synopsys ընկերությունը հայտարարել է 315 միլիոն դոլարով Virage Logic կորպորացիայի բաժնետոմսերի գնման մասին: Վերջնական գործարքը կավարտվի մինչև 2010 թ.-ի հոկտեմբերը, երբ ընկերություններն ամբողջովին կինտեգրեն մշակումներն ու կկողմնորոշվեն Virage Logic ապրանքանիշի հարցի, աշխատատեղերի և ընկերության գրասենյակների շուրջ:
«Միավորումը թույլ կտա էլ ավելի հզորացնել Synopsys-ի դիրքերը համաշխարհային շուկայում, քանի որի Virage Logic ընկերությունը գրանցված է NASDAQ բորսայում և ներկայացնում է այս ոլորտի ինժեներական ամենաառաջատար լուծումները», - նշել է Վարդանյանը:Նա դրական է գնահատել երկու խոշոր ինժեներական ընկերությունների միավորումը` նշելով, որ միկրոէլեկտրոնիկայի նախագծման ոլորտում արտադրողական ներուժն ու մշակումների ողջ հատվածը կամրապնդվի:
Միաժամանակ նա նշել է, որ ընկերությունների մրցակցությունն իրականացվում է Հայաստանի սահմաններից դուրս, նրանք մրցակցում են համաշխարհային ընկերությունների հետ: Նրանց հիմնական մրցակիցներից Հայաստանում ներկայացված է միայն Mentor Graphics-ը:
«Հայաստանում նրանց մրցակցությունը միայն լավագույն ինժեներների և ոլորտի մասնագետների համար պայքարն է», - ասել է Վարդանյանը:-0-
Ծանոթացեք լուրերին առաջինն ու քննարկեք դրանք մեր Telegram-ում
17:13 15.06.2010
