Հայաստանը IPv6 ինտերնետ նոր արձանագրության կանցնի 5-10 տարվա ընթացքում

«ԱՌԿԱ». Ո՞րն է IPv6 նոր արձանագրությանն անցնելու առանձնահատկությունը:

Գ. Սահյան. Մեր օգտագործած ինտերնետ արձանագրության մշակողները նախատեսել են գրեթե ամեն ինչ, նույնիսկ հասցեների տարածության քանակը, որն այդ պահին թվում էր, թե շատ ավելին է, քան անհրաժեշտ է: Սակայն ժամանակի ընթացքում պարզվեց, որ մեծ սխալ, անճշտություն է կատարվել և շատ ավելի մեծ քանակությամբ հասցեներ են հարկավոր, քան մշակողներն էին նախատեսել: Այս ամենի արդյունքում այս տարվա փետրվարին IANA (Internet Assigned Numbers Authority - «Ինտերնետի հասցեական տարածության ադմինիստրացիա») կազմակերպությունը, որը զբաղվում է IP-հասցեների տարածության, բարձր մակարդակի դոմենների կառավարմամբ, կանգնեց մի փաստի առաջ. այլևս չկան 4-րդ տարբերակի IP հասցեներ՝ սպառողներին տրամադրելու համար:
2011 թ.-ի փետրվարին 4-րդ տարբերակի IP հասցեները սպառվեցին: Դրան զուգահեռ մշակվում էր IPv6 արձանագրությունը, որը IP-հասցեների անսահամանափակ քանակություն է նախատեսում, որոնք կարել է տրամադրել բոլոր ցանկացողներին, և այդ քանակությունը երբեք չի սպառվի:

Կան բարդ լուծումներ պահանջող որոշակի խնդիրներ, որպեսզի հնարավոր լինի, գոյություն ունեցող IP-հասցեն օգտագործելով, ներդնել նաև նոր արձանագրություն՝ հասցեների շատ ավելի մեծ քանակությամբ: Այս ամենը որոշակի ջանքեր, համակարգող գործողություններ կպահանջի, և այսօր աշխարհում IPv6-ին անցնելու ուղղությամբ աշխատանքնքեր են տարվում և ազգային ռազմավարություններ են մշակվում:

«ԱՌԿԱ». Հայաստանում կա՞ն գրանցված IP-ների ցուցանիշներով վիճակագրական տվյալներ՝ նոր արձանագրությունների հիման վրա:

Գ. Սահյան. Նոր արձանագրությունների հիման վրա Հայաստանում գրանցված IP-հասցեների վերաբերյալ վիճակագրություն չկա, սակայն տրաֆիկն IPv6 արձանագրության հիման վրա կազմում է ոչ պակաս, քան 1 տոկոս: Այս ամենը կապված է այն բանի հետ, որ չկա IPv6 արձանագրությունն օգտագործող տեղեկատվական ռեսուրսների անհրաժեշտ քանակ: Այսինքն տեխնիկական տեսանկյունից ենթակառուցվածքի մեծ մասը պատրաստ է, բայց նայելու ոչինչ չկա, քանի որ վեբ ռեսուրսների մեծ մասն աշխատում է IPv4 հին արձանագրությամբ:

«ԱՌԿԱ». Ի՞նչ խնդիրներ կարող են առաջանալ նոր արձանագրությունների ներդրման արդյունքում:

Գ. Սահյան. Հայաստանում դեռ օգտագործվում են IPv4-ի հին ռեսուրսները, տեխնիկական խնդիրներ չենք տեսնում, սակայն նոր տեխնոլոգիաների և IPv6 նոր արձանագրությունների ներդրումը կհանգեցնի նրան, որ արձանագրության նոր տարբերակի հիման վրա ինտերնետ հասանելիությունը փոքր-ինչ սահմանափակ կլինի: Մասնավորապես, նոր արձանագրության միջոցով ինտերնետ մուտք գործողները խնդիր կունենան՝ կապված այն կայքերի վերբեռնման 10-20 վայրկյան ուշացման հետ, որոնք դեռևս աշխատում են հին արձանագրությունների հիման վրա: Այս ամենը կապված է այն բանի հետ, որ սկզբից ինտերնետը մի քանի անգամ փորձում է միանալ ռեսուրսին IPv6 արձանագրության միջոցով, և միայն մի քանի անհաջող փորձերից հետո անցնում է IPv4 արձանագրության:

«ԱՌԿԱ». Պե՞տք է, արդյոք, օգտագործողն ինչ-որ քայլեր ձեռնարկի՝ նոր արձանագրությանն անցում կատարելու համար:

Գ. Սահյան. Դրա համար օգտագործողը չպետք է ոչինչ անի, օպերատորները պետք է թարմացնեն իրենց սարքավորումները, IPv6 արձանագրություն ներդնեն, ուսուցանեն իր աշխատակազմին, ինչը լրացուցիչ ներդրումներ է ենթադրում, չնայած օպերատորները սովորաբար ծառայությունների ինքնարժեքի մեջ ներառում են սարքավորումների արդիականացման ծախսերը: Սարքավորումների արդիականացման արժեքը գնահատվում է յուրաքանչյուր երկրում անցկացված ուսումնասիրությունների հիման վրա, սակայն միջինում մեկ սերվերի փոխարինման համար  մի քանի տասնյակ հազար դոլար կպահանջվի:

Միաժամանակ նոր արձանագրությունների արդյունավետ և անխափան ներդրման համար շատ երկրներ IPv6 արձանագրության ազգային ռազմավարություն են մշակել, ինչը պետք է անի նաև Հայաստանը:

«ԱՌԿԱ». Հայաստանում կա՞ն օպերատորներ, որոնք արդեն անցել են IPv6 նոր արձանագրության:

Գ. Սահյան. Կարծում եմ, որ  գրեթե բոլոր հայկական օպերատորներն աշխատանքեր են իրականցնում այդ ուղղությամբ, որոնք գտնվում են տարբեր փուլերում: Նախատեսվում է, որ անցումը կկատարվի, ինչպես այլ երկրներում, 5-10 տարիների ընթացքում: Միաժամանակ հին տարբերակը կպահպանվի, և նախատեսվում է, որ դրանք կգործեն զուգահեռ մինչև IPv4-ի աստիճանական անկումը:-0-

Ծանոթացեք լուրերին առաջինն ու քննարկեք դրանք մեր Telegram-ում

21:17 10.06.2011