Առաջիկա 1-2 տարիների ընթացքում ավանդական ԶԼՄ-ների գովազդային բյուջեները կհոսեն Ինտերնետ
«ԱՌԿԱ» - Վերջերս ձեր ընկերությունը ինտերնետային գովազդի ոլորտում նոր նախագիծ է գործածել` AdNet.am: Ի՞նչ է այն իրենից ներկայացնում և ինչպե՞ս կանդրադառնա Հայաստանի ինտերնետ գովազդի շուկայի ընդհանուր զարգացման վրա:
Ա.Մարտիրոսյան - Մեր ընկերությունը վերջերս նոր նախագիծ է ներկայացրել՝ AdNet.am գովազդային ցանցը, որը նմանը չունի Հայաստանում: Դրա հիմնական նպատակը մեկ ընդհանուր գովազդային ցանցում միայն որակյալ հայկական ինտերնետ-ռեսուրսների համախմբումն է` ինտերնետ գովազդի առավել արդյունավետ ձևաչափերի օգտագործմամբ: Ցանցի շրջանակներում մենք արդեն անցկացրել ենք առաջին գովազդային արշավը՝ rich-media ձևաչափի օգտագործմամբ:
Ուշագրավ է, որ գովազդատուներն արդեն մեծ հետաքրքրություն են ցուցաբերում նախագծի նկատմամբ, քանի որ գովազդային ցանցի աշխատանքն այսօր շահավետ է բոլոր մասնակիցների համար՝ գովազդատուների համար, քանի որ նրանք այլևս հարկադրված չեն պայմանավորվել բազմաթիվ հարթակների հետ, և նաև հարթակների տերերի համար, քանի որ գովազդային տեղերի վաճառքով կզբաղվի գովազդային ցանցը և նրանք ակլևս ստիպված չեն մտածել կայքի դրամայնացման մասին:
Ցանցի տեխնիկական հիմքը տրամադրում է բոլոր անհրաժեշտ գործիքները գովազդային արշավների ծրագրման, դրանց անցկացման և արդյունավետության գնահատման համար:
Նախագիծը բացառիկ է Հայաստանի համար: Մենք հուսով ենք, որ AdNet.am գովազդային ցանցի աշխատանքը Հայաստանում ինտերնետ-գովազդի շուկայի զարգացման համար ազդակ կդառնա:
Անցյալ տարի մեր ընկերությունը գործարկել է իր առաջին նախագիծը՝ MediaGid.am նորությունների ագրեգատորը: Նախագիծը նույնպես եզակի է հայկական ինտերնետի համար, քանի որ ԱՊՀ տարածքի նորությունների ագրեգատորները գործում են միայն ՌԴ-ում և Ուկրաինայում:
MediaGid.am-ի գլխավոր խնդիրն օգտվողներին օպերատիվ, արդիական, վստահելի և աղբյուրների նկատմամբ անկողմնակալ տեղեկատվություն տրամադրելն է:
«ԱՌԿԱ» - Որքա՞ն է երկրում ինտերնետ գովազդի մասնաբաժինը դրա մյուս տեսակների համեմատ։ Կարո՞ղ է տեսանելի ապագայում ինտերնետ գովազդը դուրս մղել գովազդի ավանդական տեսակները, և ինչպիսի՞ գործոններից դա կախված կլինի։
Ա.Մարտիրոսյան - Գովազդային բյուջեի տեղաբաշխման ցուցանիշներ գոյություն չունեն։ Հետևաբար, միանշանակ ասել, թե ինտերնետ գովազդին կազմակերպությունների բյուջեի որ մասն է բաժին ընկնում, անհնար է։ Սակայն կարելի է պնդել, որ առաջիկա մեկ-երկու տարվա ընթացքում տեղի կունենա այլ ԶԼՄ-ներից և, մասնավորապես հեռուստատեսությունից, գովազդային բյուջեների մասնակի արտահոսք դեպի Ինտերնետ։ Դա լուրջ ազդակ կլինի գովազդային հարթակների (կայքերի) որակյալ զարգացման, հայկական Ինտերնետ գովազդի կրիչների նոր տեսակների մուտքի և գովազդի տեղադրման ավանդական մոդելից Գովազդի կրիչի հազար ցուցադրությունների արժեքի տեղադրման մոդելի անցնելու համար։
«ԱՌԿԱ» - Ինտերնետ գովազդի ո՞ր տեսակներն են առավել ճանաչված Հայաստանում և որո՞նք են առավել պահանջված արտերկրում։
Ա.Մարտիրոսյան - Մեդիագովազդը (բաներներ) ամենամեծ ճանաչումն է վայելում գովազդի այլ տեսակների թվում։Ըստ հանրաճանաչության` երկրորդ տեղում է կոնտեքստային գովազդը, որն աճի մեծ ներուժ ունի, ինչը պայմանավորված կլինի փոքր և միջին ձեռնարկությունների՝ Ինտերնետում հայտնվելով։
Զարգացած ինտերնետ-շուկա ունեցող երկրներում պատկերն ամբողջովին հակառակն է՝ կոնտեքստային գովազդի մասնաբաժինը էականորեն գերազանցում է մեդիագովազդի ծավալները։
«ԱՌԿԱ» - Հայաստանում ինտերնետ գովազդի լսարանի գնահատականներ կա՞ն: Լինու՞մ են այնպիսի իրավիճակներ, երբ գովազդի պահանջարկը գերազանցում է առաջարկը:
Ա.Մարտիրոսյան - Հայկական ինտենետ լսարանի վերաբերյալ կոնկրետ ցուցանիշներ չկան, քանի որ այստեղ որևէ ուսումնասիրություն չի կատարվում: Սակայն հայկական ինտերնետ լսարանի մեծության և կառուցվածքի մասին մոտավոր պատկերացում կարելի է կազմել ռուսական վարկանիշային համակարգերի տվյալների հիման վրա:
Liveinternet.ru վիճակագրական ծառայության տվյալների համաձայն` Հայաստանում մեկ օրվա ընթացքում ինտերնետից օգտվում է միջինը 630 հազար մարդ: Սակայն հարկավոր է հաշվի առնել, որ այս թիվը համարժեք չէ մարդկանց թվին, քանի որ միևնույն մարդը կարող է ինտերնետ մտնել մի քանի համակարգիչներից, բջջայիններից և այլ սարքավորումներից: Հետևաբար, այդ թվերը չեն արտացոլում ողջ պատկերը, սակայն թույլ են տալիս հասկանալ մոտավոր լսարանը, որով կարելի է կողմնորոշվել:
Նախորդ տարվա համեմատ՝ հայկական ինտերնետի միջին օրական լսարանն ավելացել է 5 անգամ, իսկ մեկ մարդու դիտումները՝ 3 անգամ: Այդ թվերը վկայում են այն մասին, որ անցյալ տարվա համեմատ լսարանը սկսել է հաճախ մտնել Համաշխարհային ցանց և այնտեղ երկար ժամանակ անցկացնել:
Ինչ վերաբերում է առաջարկի նկատմամբ պահանջարկի գերակշռությանը, ապա նման բան տեղի է ունենում մեծ մասամբ դեկտեմբերին և հիմնականում պայմանավորված է որոշակի ժամանակում (մեկ շաբաթով կամ ամսով) գովազդի տեղադրմամբ: Տվյալ դեպքում գովազդատուների զգալի մասի համար պարզապես տեղ չի մնում տեղադրման համար, քանի որ հիմնական տարածքն արդեն զբաղված է այլ գովազդատուների կողմից: Նման դեպքում CPM տեղադրման մոդելին անցնելը շատ անգամ կլուծի այդ խնդիրը:
«ԱՌԿԱ». Հայաստանում ո՞ր ոլորտի ներկայացուցիչներն են ավելի հաճախ օգտագործում ինտերնետ գովազդի հնարավորությունները:
Ա.Մարտիրոսյան – Ինտերնետ գովազդի հնարավորություններից ամենաշատը օգտվում են ֆինանսական հատվածի ընկերությունները, կապի օպերատորներն ու ավտոմեքենա ներկրողները: Այս ամենը կապված է այն հանգամանքի հետ, որ այդ ընկերությունների գովազդային բյուջեները թույլ են տալիս միջոցներ տեղաբաշխել գովազդի տեղադրման տարբեր ուղղություններում, այդ թվում նաև ինտերնետում:
«ԱՌԿԱ» - Շա՞տ են խաղացողները (ինտերնետ-գովազդի գործակալություններ) հայկական շուկայում:
Ա.Մարտիրոսյան – Ինտերնետ գովազդի շուկան դինամիկ է զարգանում, շատ ընկերություններ գիտակցում են Ինտերնետի ներուժը, ինչը խթան է հանդիսանում տեղադրման շուկա դրանց դուրս գալու, Ցանցի սպասարկման և հարակից ծառայությունների համար: Այսօր Հայաստանում ավելի քան 20 ընկերություններ իրենց ծառայություններն են առաջարկում, մասնավորապես՝ գովազդի տեղադրման և կայքերի առաջխաղացման ուղղությամբ:
«ԱՌԿԱ» - Ո՞ր հարթակներն են առավել գրավիչ գովազադատուների համար:
Ա.Մարտիրոսյան - Հայկական Ինտերնետի շրջանակներում առավել գրավիչ են տեղեկատվական կայքերը, ֆինանսների ոլորտում մասնագիտացված, ավտոմեքենաների գործարքների հարթակները, որոնք լսարանի որոշակի ընդգրկում են ապահովում: Իսկ հայկական Ինտերնետի սահմաններից դուրս առավելապես հետաքրքրություն են առջացնում առավելապես ռուսական պորտալներն ու սոցիալական ցանցերը:
Ինչ վերաբերում է գովազդի տեղադրման համար հարթակների ճիշտ ընտրությանը, ապա ասեմ, որ շատ դեպքերում հարթակների ընտրության հիմնական չափանիշները հարթակների այցելության քանակական, այլ ոչ թե որակական չափանիշներն են: Միայն եզակի դեպքերում գովազդատուն կամ գովազդային գործակալությունը, որը զբաղվում է ծրագրմամբ և հաճախորդի գովազդի տեղադրմամբ, ընտրության ժամանակ շեշտը դնում է այն չափանիշների վրա, ինչպիսիք են կազմությունը և աշխարհագրական դասավորությունը, չեմ խոսում արդեն այլ կարևոր չափանիշների մասին:
Հետևաբար, գովազդատուն չի ստանում այն արդյունքը, որը կարելի էր ստանալ գովազդային արշավի գրագետ ծրագրման դեպքում, և արդյունքում գովազդային բյուջեներն անարդյունավետ են բաշխվում: Արդյունքում, հարթակների մեծ մասը լսարան է հավաքում՝ ի վնաս որակի, որպեսզի առավել գրավիչ լինեն գովազդատուների համար:
«ԱՌԿԱ» - Որքա՞ն արժե Ինտերնետ գովազդը Հայաստանում:
Ա.Մարտիրոսյան - Հայկական Ինտերնետում, բացառությամբ համատեքստային գովազդի գների, գնագոյացումը պայմանավորված չէ որևէ ցուցանիշով, այդ թվում՝ հարթակի թեմատիկ ուղղվածոթյամբ, ցուցադրումների քանակով կամ լսարանի ընդգրկմամբ: Հետևաբար, սխալ կլիներ խոսել Ինտերնետ գովազդի հիմնավորված գնի մասին:
«ԱՌԿԱ» - Մարկետինգային միջոցառումների արդյունավետության որևէ գնահատականներ կա՞ն ցանցում:
Ա.Մարտիրոսյան – Մասնավորապես՝ ինտերնետ գովազդի մարկետինգային միջոցառումների արդյունավետության գնահատականների համար առաջին հերթին անհրաժեշտ է ուսումնասիրման համար համապատասխան գործիք ունենալ ձեռքի տակ, որը գրեթե բացակայում է Հայաստանում: Դա պայմանավորված է նրանով, որ գովազդատուները շատ դեպքերում ուշադրություն չեն դարձնում արդյունավետության գնահատականի անհրաժեշտության վրա կամ գովազդատուների աշխատակիցները գովազդային արշավների արդյունքների վերլուծության համար բավականաչափ գիտելիքներ չունեն, ինչն իրեն հերթին խոչընդոտում է գովազդային բյուջեի բաշխման արդյունավետությանը: --0--
Ծանոթացեք լուրերին առաջինն ու քննարկեք դրանք մեր Telegram-ում
01:11 03.08.2011