«ԱրմենՏելը» ողջունում է հայկական ինտերնետի շուկայում ընկերությունների համախմբման գործընթացը. գլխավոր տնօրեն

ԵՐԵՎԱՆ, 13 սեպտեմբերի. /ԱՌԿԱ/. «ԱրմենՏելը» (ապրանքանշը՝ Beeline) ողջունում է հայկական ինտերնետի շուկայում ընկերությունների միավորման և կլանման գործընթացը, «ԱՌԿԱ» գործակալությանն ասաց ընկերության գլխավոր տնօրեն Իգոր Կլիմկոն՝ մեկնաբանելով Ucom և Netsys ընկերությունների միավորման գործարքը:

Հայկական երկու ինտերնետ-ընկերությունները՝ UCom-ն ու Netsys-ը, երեքշաբթի հայտարարել են միավորման մասին և նշել են, որ մտադիր են  համատեղ տեխնիկական բազայի հիման վրա կառուցել նոր ընդլայնված ծառայություններ՝ ընդհանուր հնարավորությունների կիրառմամբ: Բաժնետերերի խոսքերով՝ միավորման արդյունքում կգործի գերժամանակակից ցանց և համապատասխան տեխնիկական բազա, որը թույլ կտա տրամադրել բազմաթիվ հոսթինգային ծառայություններ և սպասարկել կորպորատիվ հաճախորդների:

«Ես շատ ուրախ եմ, որ շուկայում տեղի է ունենում միավորման և կլանման գործընթաց, ինչը խոսում է շուկայի որոշակի հասունության և ընկերությունների ձևավորման մասին, որոնք մրցակցության մեջ են մտնելու մեզ հետ, քանի որ տվյալ պահին մենք արդեն Ինտերնետի, ծառայությունների որակի և տրամադրված արագության գծով բավական բարձր նշաձող ենք դրել»,- ասաց Կլիմկոն:

Ըստ նրա՝ շուկայում նման մրցակցության առկայությունը կլինի ոչ միայն բնագավառի, այլ նաև ողջ երկրի զարգացման օգտին:

Միաժամանակ ընկերության ղեկավարը չի բացառել կլանման,  միաձուլման, ամրապնդման միջոցով հայկական շուկայում ինտերնետ ընկերությունների հետագա համախմբման հնարավորությունները՝ սակայն բացառելով նման համախմբումների արդյունքում մենաշնորհների ձևավորումը:

«Ինտերնետի ոլորտը երբեք մենաշնորհային բնույթ չի կրել, այդ պատճառով առաջիկայում մի քանի ընկերություններ չեն լինի, որոնք մենաշնորհային դիրքեր են զբաղեցնում, առավել ևս, որ օպերատորների զարգացման  համաշխարհային միտումները ցույց են տալիս, որ մենաշնորհները ստեղծվում են այնտեղ, որտեղ սահմանափակ բնական ռեսուրս կա՝ գազ, նավթ, կամ ռադիոհաճախականություններ»,- ասաց Կլիմկոն:

Ինտերնետի ոլորտում, ինչպես կարծում է գլխավոր տնօրենը, դժվար թե կարելի է մենաշնորհ հորինել, քանի որ մշտապես նոր օպերատորներ և պրովայդերներ կհայտնվեն, որոնք նոր ծառայություններ, արագություն, հնարավորություններ և տեխնոլոգիաներ կառաջարկեն:

«ԱրմենՏել» ՓԲԸ-ն «ՎիմպելԿոմ» ընկերության (ապրանքանիշը` Beeline) դուստր ձեռնարկությունն է, 2007 թ.-ի ապրիլից «ԱրմենՏելի» 100 տոկոս բաժնետոմսերը պատկանում են ռուսական ընկերությանը: «ԱրմենՏել» ընկերությունը տրամադրում է ֆիքսված և բջջային կապի, ինչպես նաև գերարագ ինտերնետի ծառայություններ: -0-

Ծանոթացեք լուրերին առաջինն ու քննարկեք դրանք մեր Telegram-ում

23:00 13.09.2011