ՀԱՅԿԱԿԱՆ ԲԱՆԿԵՐԸ ՊԵՏՔ Է ԱԿՏԻՎԱՑՆԵՆ ՍՄԱՐԹՖՈՆՆԵՐԻ ՁԵՌՔԲԵՐՄԱՆ ՎԱՐԿԱՎՈՐՈՒՄԸ. ՓՈՐՁԱԳԵՏ

ԵՐԵՎԱՆ, 14 նոյեմբերի. /ԱՌԿԱ/. Հայկական բանկերը պետք է աշխուժանան սմարթֆոնների վարկավորման շուկայում, «ԱՌԿԱ» գործակալությանը ասաց «Ձեռնարկությունների ինկուբատոր» հիմնադրամի տնօրեն Բագրատ Ենգիբարյանը:
«Բանկային համակարգը պետք է շահագրգռված լինի սմարթֆոնների գնման հասանելի վարկերի տրամադրմամբ այնպես, ինչպես դա կատարվում է նոութբուքերի դեպքում»,- ասաց նա:

Ենգիբարյանի խոսքով, սմարթֆոնների գնման առավել ձեռնտու պայմաններ առաջարկող հայկական բջջային օպերատորների գնային քաղաքականությունը թույլ տվեց մի փոքր բարելավել իրավիճակը, սակայն «ժամանակակից աշխարհում այդպիսի պիտանի սարք ինչպես սմարթֆոնն է, առայսօր հասանելի չէ բնակչության լայն շերտերին»:

«Ինչպես գիտեք, հայերը շատ հետաքրքիր առանձնահատկություն ունեն՝ նրանք միշտ ցանկանում են ունենալ նորը և լավագույնը: Մնում է՝ հնարավորություն ստեղծել, որ այդ «նորը և լավագույնը» ավելի հասանելի լինի քաղաքացիների համար»,- ասաց նա:
Ենգիբարյանն ընդգծեց, որ հայ բնակչությունը շահագրգռված է բջջային սարքերի օգտագործմամբ, որոնք պարզ և արագ ինտերնետ-հասանելիություն, ինչպես նաև «ամպային» ծառայություններ են ապահովում:

«Նոր տեխնոլոգիաները շատ արագ են հայտնվում մեր երկրում: Սա շատ կարևոր է մեզ համար տարածաշրջանի ՏՏ ոլորտի առաջատարի դիրքերի լուրջ հավակնությունների և տեղեկատվական զարգացած հասարակության համատեքստում, ինչը հնարավոր չէ առանց հեռահաղորդակցության ոլորտի նորագույն տեխնոլոգիաների օգտագործման»,- ավելացրեց նա:

Հայաստանում Apple-ի պաշտոնական ներկայացուցիչ Orange Armenia բջջային օպերատորն ուրբաթ օրը տեղական շուկայում ներկայացրել է iPhone 4S նոր պաշտոնական մոդելը, որը դեռ չի հայտնվել ԱՊՀ երկրներում: -0-

Ծանոթացեք լուրերին առաջինն ու քննարկեք դրանք մեր Telegram-ում

22:28 14.11.2011