Հայաստանում ՏՏ ոլորտի խնդիրը կադրերի ապահովման հարցն է

«WEBEX Technologies» ընկերության տնօրեն Հայկ Առաքելյանի բացառիկ հարցազրույցը

«ԱՌԿԱ». Պարոն Առաքելյան, որքա՞ն ժամանակ է ձեր ընկերությունն աշխատում ՏՏ շուկայում և ո՞ր ուղղությամբ է մասնագիտանում:

Ա. Առաքելյան. «WEBEX Technologies» ընկերությունը հիմնադրվել է 2008 թվականին և մասնագիտանում է վեբ-կայքերի, վեբ-անիմացիաների, առցանց խաղերի ստեղծման, ինչպես նաև Java լեզվով ցանկացած հավելվածների ուղղությամբ:

Ընկերության աշխատանքին առանձնակի ազդակ հաղորդվեց 2010 թվականին, ինչը պայմանավորված էր կադրային կազմի ընդլայնմամբ: Այդ ժամանակից ի վեր մենք հասցրել ենք ավելի քան 20 նախագիծ իրականացնել, որից 10-ը բավականին լուրջ են, մենք, մասնավորապես, ստեղծեցինք www.nver.am ինտերնետ-խանութը:

«ԱՌԿԱ». Ի՞նչ հաջողություններ եք գրանցել 2011 թվականին:

Ա. Առաքելյան. Կոնկրետ 2011 թվականին մեր ամենամեծ ձեռքբերումը եղավ առցանց խաղերի ստեղծման նախագծի իրականացման առաջարկը: Չեմ ցանկանում մանրամասներ նշել, սակայն այս տարվա ընթացքում այդ նախագիծը  կներկայացվի հայ սպառողին:

Բացի այդ, հենց 2011 թվականին մեր ընկերությունը սկսեց հետզհետե փոխել մասնագիտացումը՝ նախապատվությունը տալով առցանց խաղերին: Այս շրջադարձը պայմանավորված է ոլորտի մեծ առավելությամբ՝ առցանց խաղերը դժվար է ստեղծել, ինչը մրցակցային առավելություն է ստեղծում մեզ համար: Միաժամանակ այս պրոդուկտի պահանջարկը մեծ է ողջ աշխարհում:

«ԱՌԿԱ». Ապագայում ի՞նչ ծրագրեր ունեք: Ի՞նչ նոր նախագծեր եք պատրաստվում իրականացնել:

Ա.Առաքելյան. Այսօր մեր ծրագրերում է ընդլայնել WEBEX Technologies ներկայությունը ՏՏ արտադրանքի միջազգային շուկայում: Քանի որ հայկական շուկան շատ փոքր է, մեծ եկամուտ ակնկալելն անիրական է:

2012 թվականին մենք ծրագրում ենք մեր ներկայացուցչությունը բացել Թբիլիսիում: Վրացական շուկան մեզ հետաքրքրում է իր մասշտաբներով ու ծավալներով: Միաժամանակ պետք է նշել, որ ներկայացուցչությունը պատվերներ կընդունի, իսկ նախագծերը կիրականացվեն Հայաստանում:

Բացի այդ, մենք ծրագրում ենք ներկայացուցչություններ բացել Ռուսաստանում, ԱՄՆ-ում և Լեհաստանում:

Օտարերկրյա հաճախորդներին ներգրավելու գործում մեծ դեր է խաղում մեր կայքը՝ www.webex.am-ը, որտեղ ներկայացված է ընկերության պորտֆոլիոն:

«ԱՌԿԱ». Ի՞նչ հիմնական խնդիրների եք բախվել ձեր գործունեության ընթացքում:

Ա. Առաքելյան. Ամենամեծ խնդիրը, որին բախվում է մեր ընկերությունը, կադրերի ապահովման հարցն է, քանի որ մենք բացարձակապես գոհ չենք ժամանակակից հայկական բուհերի տված գիտելիքներից: Ուսանողները սովորելու ցանկություն ունեն, սակայն հայկական բուհերում այսօր անհրաժեշտ գիտելիքներ չեն տալիս:

Բացի այդ, կա նաև հարկային արտոնությունների հարցը, որը Հայաստանում փաստացիորեն բացակայում է ՏՏ ոլորտի համար:

«ԱՌԿԱ» . Այդ դեպքում ինչպե՞ս եք լուծում կադրերի խնդիրը:

Ա.Առաքելյան. Մեր ընկերությունն իր կադրերն է պատրաստում՝ դասընթացներ անցկացնելով ՏՏ-բուհերի ուսանողների համար, ովքեր գիտելիքների լավ պաշար ունեն: Այսպիսով, մենք աճեցնում ենք մասնագետների՝ Webex Technologies-ում աշխատելու համար անհրաժեշտ գիտելիքներով:

«ԱՌԿԱ». Ի՞նչ գնահատական եք տալիս Հայաստանի գործարար միջավայրին:

Ա.Առաքելյան. Արդեն մի քանի տարի է՝ մեր կառավարությունը հայտարարում է, որ ՏՏ-ն գերակա ոլորտ է, սակայն որևէ հարկային առավելություն չկա այս ոլորտում: Արդյունքում մենք չենք զգում, որ հարկային բեռը մեր նկատմամբ ավելի մեղմ է, քան այլ ոլորտների նկատմամբ: Վրաստանում, օրինակ, ՏՏ ոլորտի ընկերությունների համար պետությունն առանց հարկերի երեք տարվա գործունեություն է ապահովում:
 
Հայաստանում նաև դժվարություններ են առաջանում գործունեության ընդլայնման համար ներդրումների ներգրավման հարցում: Չնայած ՀՀ կառավարության որոշ քայլերին, որոնք ուղղված են գործարար միջավայրի բարելավմանը, իրական արդյունքներ դեռ չեն երևում: Հուսանք, որ մոտակա ժամանակում կառավարության գործունեությունն այդ ուղղությամբ կակտիվանա:--0-

Ծանոթացեք լուրերին առաջինն ու քննարկեք դրանք մեր Telegram-ում

13:54 31.05.2012