Նոր լրատվամիջոցները կլրացնեն ավանդական լրատվամիջոցներին

BarCamp ոչ ֆորմալ համաժողովը, որը կազմակերպվել էր ՌԻԱ Նովոստիի աջակցությամբ, անցկացվում էր Երևանում հունիսի 9-11-ը: Թվով չորրորդ համաժողովը նույն տեղում էր հավաքել տեղեկատվական տեխնոլոգիաների ոլորտի ներկայացուցիչներին՝ ծրագրավորողներ, ինժեներներ, բլոգերներ, օնլայն-լրագրողներ և սոցիալական կայքերի ակտիվիստներ: Համաժողովի ընթացքում քննարկվեցին մի շարք հարցեր, որոնք կապված էին օնլայն-տեխնոլոգիաների, ծրագրավորման, ինժեներական նորարար լուծումների և սոցիալական մեդիայի զարգացման հետ: «Մոսկվայում 2011-2012 թվականներին բողոքի ակցիաների լուսաբանման նոր ձևերը» թեմայով հանդես եկավ «Մոսկովսկիե նովոստի» առցանց ռեսուրսի գլխավոր խմբագիր Ալեքսանդր Բոգոմոլովը: Հենց նրա հետ էլ զրուցել է «Նովոստի-Արմենիա» գործակալության թղթակիցը:

«Նովոստի-Արմենիա». Պարոն Բոգոմոլով, բողոքի ակցիաների լուսաբանման ի՞նչ նոր ձևեր կառանձնացնեք:

Ա. Բոգոմոլով. Նախևառաջ դա կենդանի ռեպորտաժն է՝ նկարահանված բջջային սարքերից, համայնապատկերային 3D նկարահանումը, ինչպես նաև սմաթֆոնով կամ այլ սարքով վայրկենապես արված լուսանկարը: Նաև Twitter-ալիքների հեռարձակման ալիքների միացումը, եթե, իհարկե, վստահ ենք դրանց «վավերական» լինելու մեջ, այսինքն՝ վստահ ենք, որ Twitter-ակաունթը իսկապես պատկանում է տվյալ մարդուն, օրինակ, ընդդիմության որևէ առաջնորդի: Դա կարող է լինել նաև տեսանյութ, որը նկարահանվել և նույն պահին փոխանցվել է թողարկման:

«Նովոստի-Արմենիա». Իսկ որո՞նք ենք տեղեկության փոխանցման ոչ ավանդական ձևաչափերի առավելությունները՝ ավանդականների, հատկապես հեռուստատեսության, YouTube-ում և սոցիալական կայքերում տեսանյութեր տեղադրելու հետ համեմատելու դեպքում:

Ա. Բոգոմոլով. Հիմնական առավելությունն այն է, որ համացանցի լսարանը ցանկանում է տեղեկությունը ստանալ այն տեսքով, որին սովոր է, այդ պատճառով մենք հարմարվում ենք լսարանի պահանջներին և խոսում ենք նույն լեզվով, պատրաստում ենք կարճ, «վարակակիր» տեսանյութեր, որոնք կարող են շատ արագ տարածվել:

Երկրորդ առավելությունը արագությունն է: Այդ իրավիճակում, ըստ էության, մենք կարող ենք որոշ դեպքերում պարտվել հեռուստաալիքներին ուղիղ եթերի արագության առումով, գուցե հաղորդագրությունների փոխանցման արագությամբ մենք զիջում ենք որոշ գործակալությունների, սակայն, ընդհանուր առմամբ, մեր «արտադրանքն» ամենաարագն է:            

«Նովոստի-Արմենիա». Ձեր ասածից կարելի՞ է հետևություն անել, որ մոտ ժամանակում տեղեկության փոխանցման նոր մեթոդները կգերիշխեն:

Ա. Բոգոմոլով. Չեմ կարծում, որ կգերիշխեն, ավելի շուտ՝ ոչ ավանդականները կլրացնեն ավանդականներին, քանի որ միևնույն է՝ տեղեկատվության բոլոր տեսակների պահանջարկը մեծ է: Գլխավորն այն է, որ այդ տեղեկատվությունը լինի որակյալ և փոխանցվի պրոֆեսիոնալ մակարդակով:

Ինչպես հեռուստատեսությունը հաղթեց թերթին, այնպես էլ տեղեկության փոխանցման նոր ձևերը չեն փոխարինի ավանդականին, պարզապես նրանք ունեն իրենց լսարանը, որն, ամենայն հավանականությամբ, չի ընդունի հին մեթոդները:

«Նովոստի-Արմենիա». Ձեր կարծիքով՝ ո՞ր ոչ ավանդական մեթոդներն են կիրառելի հայկական իրականության մեջ:

Ա. Բոգոմոլով. Ես լավ ծանոթ չեմ Հայաստանի մեդիա-դաշտին: Սակայն դատելով տեխնոլոգիական զարգացման մակարդակից, մասնավորապես՝ ցանցերի, 4G կապի առկայությունից, դատելով, որ մարդիկ ունեն գաջեթներ, նրանք բավականաչափ կրթված են, կարողանում են օգտվել դրանցից, հասկանում են ժամանակակից միտումները: Ինձ թվում է՝ որևէ խոչընդոտ չկա Հայաստանում լուսաբանման ոչ ավանդական մեթոդները կիրառելու համար, և եթե դա գործում է ողջ աշխարհում, ինչու՞ պետք է չլինի Հայաստանում:--0-

Ծանոթացեք լուրերին առաջինն ու քննարկեք դրանք մեր Telegram-ում

11:51 12.06.2012