LimeTech ընկերությունը մտադիր է միջազգային շուկա մտնել 2012 թվականին

LimeTech ընկերության տնօրեն Գևորգ Սաֆարյանի բացառիկ հարցազրույցն «ԱՌԿԱ» գործակալությանը

«ԱՌԿԱ» - Պարոն Սաֆարյան, որքա՞ն ժամանակ է ձեր ընկերությունը գործում հայկական շուկայում, չէիք ներկայացնի LimeTech-ի գործունեությունը 2011 թվականին:

Գ.Սաֆարյան – 2008 թվականին ստեղծված LimeTech ընկերությունը զբաղվում է տարբեր ՏՏ ծառայությունների, մասնավորապես, բիզնես-համակարգերի ավոտամատացման լուծումների տրամադրմամբ: Պետք է նշեմ, որ 2011 թվականը մեզ համար բավականին հաջող էր: Տարվա գլխավոր ձեռքբերումը ես համարում եմ IT Guide դուստր ընկերության բացումն Արցախում, որը կաշխատի ԼՂՀ-ում որպես ոչ միայն LimeTech-ի, այլ նաև այլ ընկերությունների ՏՏ լուծումների մատակարար:

«ԱՌԿԱ» - Ո՞ր շուկայի համար է նախատեսված ձեր արտադրանքը: Արդյոք, այն պահանջարկ ունի՞ Հայաստանում:

Գ. Սաֆարյան – Մեր հիմնադրման պահից մենք կողմնորոշվել ենք դեպի հայկական շուկա, և արդեն այսօր ունենք ավելի քան 50 հաճախորդ: Մասնավորապես, հեռահաղորդակցությունների ոլորտում մենք համագործակցում ենք Հայաստանում գործող երեք հեռահաղորդակցական ընկերություններից երկուսի հետ՝ «ԱրմենՏելի» (Beeline ապրանքանիշ) և «Ղ-Տելեկոմ» (VivaCell – MTC ապրանքանիշ), ինչպես նաև Արցախում գործող «Ղարաբաղ-Տելեկոմ» ընկերության հետ: Մենք նաև աշխատում ենք բանկերի, այդ թվում՝ Ամերիաբանկի, Արմսվիսբանկի, Ինեկոբանկի, Ակբա Կրեդիտ Ագրիկոլ Բանկի հետ:

Ինչ վերաբերվում է մեր արտադրանքի պահանջարկին, ապա կարող եմ ասել, որ, օրինակ, հերթերի կառավարման համակարգեր օգտագործող մի քանի տասնյակ հայկական ֆիրմաներից միայն երկուսն են օգտվում մեր լուծումներից: Նույնիսկ եղել են գերմանական համակարգերի փոխարինման դեպքեր մեր ընկերության համակարգերով:
 
«ԱՌԿԱ» - Դուք համագործակցու՞մ եք այդ բնագավառի համաշխարհային որևէ
առաջատարի հետ:

Գ.Սաֆարյան – Ներկայում LimeTech-ը չի համագործակցում միջազգային ընկերությունների հետ, բայց մենք ամրապնդում ենք մեր կապերը տեղական ընկերությունների հետ: Մասնավորապես, առաջիկայում մենք համագործակցության պայմանագիր ենք ստորագրելու Հայաստանի խոշորագույն ՏՏ-ընկերություններից մեկի հետ, որի անունը չէի ցանկանա հրապարակել՝ ելնելով կոմերցիոն պատճառներից:
 
«ԱՌԿԱ» - Որոն՞ք են 2012 թվականի ձեր ծրագրերը:

 Գ.Սաֆարյան – 2012 թվականին մենք մտադիր ենք մտնել միջազգային շուկա, մասնավորապես, մենք կներկայացնենք «City Guide» պրոդուկտը՝ Պրահա, Բրյուսել, Դուբայ այցելող զբոսաշրջիկներին քաղաքի մասին տեղեկություններ հաղորդող տեղեկատվական կրպակ, այսինքն, ուր կարելի է գնալ, որտեղ ժամանակ անցկացնել և այլն: Մեր արտադրանքի բարձր որակի շնորհիվ մենք հույս ունենք կարճ ժամանակում հասնել մրցակիցների նկատմամբ որակական առավելության:

«ԱՌԿԱ» - Ինչո՞վ են գրավիչ ձեր առաջարկությունները գործարարների համար, ի՞նչ առավելություններ է տալիս նրանց ձեր պրոդուկտի օգտագործումը:
 
Գ.Սաֆարյան – Մենք մեր գործունեությամբ արդեն ապացուցել ենք, որ բարձր որակի արտադրանք ենք տրամադրում մատչելի գնով: Բացի այդ, LimeTech ոչ միայն վաճառում է, այլ նաև իրականացնում է իրացված պրոդուկտի սպասարկումը՝ ապահովելով համակարգերի շահագործման ընթացքում առաջացած բոլոր խնդիրների օպերատիվ և արդյունավետ լուծումը:

Ինչ վերաբերում է մեր լուծումների օգտագործման առավելություններին, ապա, նախևառաջ, դրանք նպաստում են հաճախորդների սպասարկման մակարդակի բարձրացմանը: Մյուս կողմից, հնարավոր է դառնում ֆիրմայի սպասարկող անձնակազմի վերահսկումը, մասնավորապես, հնարավոր է մանրամասն տեղեկության ստացում այն մասին, թե որքանով պրոֆեսիոնալ է կատարվում հաճախորդի սպասարկումը ֆիրմայի աշխատակցի կողմից:

«ԱՌԿԱ» - Ինչպե՞ս են հայ ձեռնարկատերերը վերաբերվում ավտոմատացված բիզնես-համակարգերին, պատրա՞ստ են նրանք, արդյոք, միջոցներ ծախսել իրենց բիզնեսի ավտոմատացման համար:

Գ.Սաֆարյան – Բազմաթիվ հայ գործարարներ պատրաստ չեն միջոցներ ներդնել մեր լուծումների մեջ, քանի որ չեն գիտակցում դրանց արդյունավետությունը: Այսօր հայկական տնտեսության միայն ֆինանսական ճյուղն է բարձր գնահատում բիզնես-համակարգերի ավտոմատացման առավելությունները: Բայց այստեղ էլ բոլորը չեն, տվյալ հատվածի ներկայացուցիչների միայն 50 տոկոսն է համաձայնում ներդրում կատարել առաջարկած տեխնոլոգիաների մեջ: Մյուսներն առայժմ պասիվ են՝ հաշվի առնելով իրենց ընկերությունների ոչ մեծ չափերը, և այն, որ դեռ չեն հասունացել դրա համար:

«ԱՌԿԱ» - Որքանո՞վ ձեռնտու է ներդրումներ կատարել տվյալ բնագավառում, և արդյոք, ուժե՞ղ է այս ոլորտում մրցակցությունը:
 
Գ.Սաֆարյան – Իմ կարծիքով՝ Հայաստանի ՏՏ ոլորտում ներդրումներ կատարելը շատ ձեռնտու է, քանի որ կան տաղանդավոր երիտասարդներ, կա տարիների կուտակած փորձ: Այս ամենը թույլ կտա ցանկացած միջազգային ընկերության մասնաճյուղ բացել Հայաստանում և հաջողությամբ առաջ տանել բիզնեսը: Ինչ վերաբերում է մրցակցությանը, ապա կարող եմ ասել, որ այսօր հայկական շուկայում մեր լուծումների նման լուծումներ տվող ընկերություններ չկան:

«ԱՌԿԱ» - Ինչպե՞ս եք գնահատում Հայաստանի բիզնես-կլիման:

Գ.Սաֆարյան – Բիզնեսի զարգացման հիմնական խոչընդոտը հայկական շուկայի փոքր ծավալն է: Որպես մեկ այլ խնդիր կարող եմ առանձնացնել երկրում ներդրումային դաշտի բացակայությունը: Արևմուտքում, հասնելով որոշակի ճանաչելիության, հնարավոր է ներդրողների ներգրավել և ընդլայնել բիզնեսը: Ասյտեղ դա չկա: Մյուս կողմից, մուտքն արտաքին շուկա թույլ կտա լուծել մի շարք խնդիրներ, մասնավորապես, շուկայի փոքր ծավալի խնդիրը:-0-

Ծանոթացեք լուրերին առաջինն ու քննարկեք դրանք մեր Telegram-ում

17:23 14.04.2012