ՀԾԿՀ-ն ու «ԱրմենՏելը» Հայաստանում ամրակցված կապի օգտագործման մակարդակի բարձրացման փաթեթային լուծումներ են մշակում
ԵՐԵՎԱՆ, 27 հոկտեմբերի. /ԱՌԿԱ/. Հայաստանի հանրային ծառայությունները կարգավորող հանձնաժողովն ու «ԱրմենՏել» հեռահաղորդակցական օպերատորը ամրակցված կապի օգտագործման մակարդակի բարձրացման փաթեթային լուծումներ են մշակում, երեքշաբթի «Նովոստի» միջազգային մամուլի կենտրոնում տեղի ունեցած մամուլի ասուլիսի ժամանակ ասել է Հայաստանի հանրային ծառայությունները կարգավորող հանձնաժողովի անդամ Սամվել Արաբաջյանը:
«Հայաստանում ամրակցված կապի տրաֆիկի զգալի անկում է գրանցվել, ինչը պայմանավորված է բջջային կապի շուկայում գոյություն ուենցող առաջարկներով ու տրամադրվող ծառայությունների շրջանակի ընդլայնմամբ», - ասել է Արաբաջանյանը:
Նրա խոսքերով՝ շարժական ծառայությունների սակագների նվազումը հանգեցրեց նրան, որ Հայաստանում ամրակցված կապը դառնում է ոչ մրցունակ, նվազում է ամրակցված տրաֆիկի ծավալը, ինչը որոշակի մտահոգություն է առաջացնում:
Նա նշել է, որ վերջին երկու տարվա դինամիկան ցույց է տալիս, որ ամրակցված կապից ստացված եկամուտի տեսակետից ընկերությունները կրճատում են նկատում, ինչը վկայում է իրավիճակը ուսումնասիրելու անհրաժեշտության մասին՝ ամրակցված ցանցի լայն կիրառման օպտիմալ լուծումներ փնտրելու համար:
«Հարկավոր է որոշակի ճկուն լուծումներ գտնել, կարծում եմ, որ մենք «ԱրմենՏելի» հետ միասին կփորձենք որոշակի փաթեթային լուծումներ գտնել բնակչության համար, քանի որ ակնհայտ է, որ այսօրվա դրությամբ բարձրացման ուղղությամբ արված փոփոխությունները կլինեն ոչ գրավիչ և ոչ մրցունակ», - ասել է Արաբաջյանը:
Հայկական շուկայում այս պահին ամրակցված կապի ծառայություններ է մատուցում կապի միայն մեկ օպերատոր՝ «ԱրմենՏել» ընկերությունը: Այլընտրանքային ամրակցված կապի մի քանի օպերատոր արդեն ստացել են ՀԾԿՀ-ի արտոնագրերը, սակայն դեռ փաստացի չեն սկսել ցանցի կոմերցիոն շահագործումը:
«ԱրմենՏել» ՓԲԸ-ն «ՎիմպելԿոմ» ընկերության (ապրանքանիշը` Beeline) դուստր ձեռնարկությունն է, 2007 թ.-ի ապրիլից «ԱրմենՏելի» 100 տոկոս բաժնետոմսերը պատկանում են ռուսական ընկերությանը: «ԱրմենՏել» ընկերությունը տրամադրում է ֆիքսված և բջջային կապի, ինչպես նաև գերարագ ինտերնետի ծառայություններ:
Հայաստանում «ԱրմենՏել» (ապրանքանիշը՝ Beeline) ընկերության մաքուր օպերացիոն հասույթը երկրորդ եռամսյակում, 2010 թ.-ի առաջին եռամսյակի համեմատ, ավելացել է 6,6 տոկոսով և կազմել 17,073 միլիոն դրամ (շուրջ 44,5 միլիոն դոլար): Ամրակցված կապից ստացված ընկերության հասույթը, երկրորդ եռամսյակում, 2010 թ.-ի առաջին եռամսյակի համեմատ, ավելացել է 1,4 տոկոսով, իսկ 2009 թ.-ի նույն ժամանակահատվածի համեմատ կրճատվել է 5,2 տոկոսով և կազմել 10,372 միլիոն դրամ (շուրջ 27 միլիոն դոլար):-0-
Ծանոթացեք լուրերին առաջինն ու քննարկեք դրանք մեր Telegram-ում
18:48 27.10.2010