ivaCell-MTS-Ը ՌԱԴԻՈՀԱՃԱԽԱԿԱՆՈՒԹՅՈՒՆՆԵՐ Է ՍՏԱՑԵԼ LTE ՏԵԽՆՈԼՈԳԻԱՆԵՐ ԳՈՐԾԱՐԿԵԼՈՒ ՀԱՄԱՐ
ԵՐԵՎԱՆ, 10 նոյեմբերի. /ԱՌԿԱ/. ՀԾԿՀ-ն չորեքշաբթի նիստի ժամանակ որոշում է ընդունել «Ղ-ՏԵԼԵԿՈՄ» փակ բաժնետիրական ընկերությանը ռադիոհաճախականությունների հատվածների օգտագործման թույլտվություն տրամադրելու մասին:
LTE չորրորդ սերնդի բջջային տեխնոլոգիա է: Ապահովում է հիմնական կայանից բաժանորդի սարքին տվյալների փոխանցման մինչև 100 Մբիթ/վ և բաժանորդից կայան մինչև 50 Մբիթ/վ արագություն:
Ինչպես Հանձնաժողովի նիստի ընթացքում հայտնեց ՀԾԿՀ հեռահաղորդակցությունների վարչության պետ Գևորգ Գևորգյանը, «Ղ-Տելեկոմը» Հայաստանում առաջին ընկերությունն է, որին 40 Մհց, միաժամանակ՝ Երևանում՝ 2500-2520 ՄՀց, իսկ մարզերում՝ 2600-2640 ՄՀց դիապազոնով ռադիոհաճախականությունների հատվածների օգտագործման թույլտվություն է տրվում՝ LTE տեխնոլոգիայի միջոցով 4G բջջային ցանցի ստեղծման համար։
Լիցենզիան տրամադրվել է մինչև 2019 թվականի նոյեմբերի 4-ը։ Ռադիոհաճախականությունների ստացման թույլտվության համար ընկերությունը պետք է 990 մլն դրամ վճարի։ Այդ դիապազոնով ռադիոհաճախականությունների օգտագործման թույլտվության պայմանների համաձայն, VivaCell-MTS-ը պարտավորվում է LTE ցանցը շահագործման հանձնել մինչև 2011 թվականի մարտի 1-ը։
Ինչպես լրագրողներին հայտնեց VivaCell-MTS ընկերության գլխավոր տնօրեն Ռալֆ Յիրիկյանը, ընկերությունն արդեն ցանցի կառուցման աշխատանքներ է վարում, և նախատեսվում է, որ արդեն դեկտեմբերի 1-ից այն թեստային-առևտրային շահագործման կհանձնվի, իսկ փետրվարի վերջին ամբողջությամբ առևտրային ծառայությունների անցում կկատարվի։
«Սկզբնական փուլում չորրորդ սերնդի ծառայությունները հասանելի կլինեն Երևանի կենտրոնում, ինչից հետո ցանցի ընդլայնում է ծրագրվում ողջ մայրաքաղաքով մինչև 2011 թվականի ավարտը՝ մարզերում զուգահեռ զարգացմանը զուգընթաց»,- ասաց Յիրիկյանը։
Նոր սերնդի ցանցի գործարկումը, նրա խոսքերով, բաժանորդներին գերարագ Ինտերնետից օգտվելու հնարավորություն կտա, որը 10 անգամ գերազանցում է 3G ցանցի արագությունների հնարավորությունները։
Ինչ վերաբերում է ընկերության՝ չորրորդ սերնդի ծառայությունների սակագնային քաղաքականությանը, ապա, ինչպես հայտնեց գլխավոր տնօրենը, 4G ցանցի գերարագ Ինտերնետ ծառայությունների սակագները չեն տարբերվի երրորդ սերնդի ցանցում գործող ծառայություններից։ Տարբերությունը կլինի միայն մոդեմը, որոնց արժեքը համաշխարհային շուկայում առայժմ բարձր է ներդրվող տեխնոլոգիաների նոր լինելու պատճառով։
«Սակայն մենք կփորձենք դիտարկել մեր բաժանորդների համար առավել օպտիմալ տարբերակները, որպեսզի դրանք լուրջ ազդեցություն չունենան նրանց վրա ֆինանսական տեսանկյունից»,- ասաց Յիրիկյանը։
ՎիվաՍել–ՄՏՍ-ը (Ղ-Տելեկոմ ՓԲԸ) Հայաստանի շարժական կապի օպերատոր է, որը հզոր 2G/3G ցանց ունի և տրամադրում է ձայնային և տվյալների փոխանցման ծառայությունների բազմազան տեսականի` Հայաստանի ամբողջ տարածքում: Հիմնադրման օրվանից` 2005թ. հուլիսի 1-ից, ՎիվաՍել–ՄՏՍ-ը կարճ ժամանակամիջոցում կարողացել է ստեղծել համահանրապետական ցանց և բաժանորդների մեծ բազա: ՎիվաՍել–ՄՏՍ-ը հետամուտ է ոլորտի բոլոր զարգացումներին` ի շահ երկրի շարժական հեռահաղորդակցության շուկայի: -0-
Ծանոթացեք լուրերին առաջինն ու քննարկեք դրանք մեր Telegram-ում
19:09 10.11.2010