Կարգավորիչը 1 մլն դրամով տուգանել է «ԱրմենՏել» ընկերությանն իր խողովակաշարի միջոցով GNC-Alfa–ի մալուխի անցկացումն ուշացնելու համար
ԵՐԵՎԱՆ, 14 մայիսի. /ԱՌԿԱ/. Հայաստանի հանրային ծառայությունները կարգավորող հանձնաժողովը (ՀԾԿՀ) չորեքշաբթի նիստի ժամանակ 1 մլն դրամով տուգանել է «ԱրմենՏել» ՓԲԸ–ին (ապրանքանիշը` Beeline)։
Ինչպես հարցը ներկայացնելիս նշել է ՀԾԿՀ հեռահաղորդակցությունների վարչության պետ Գևորգ Գևորգյանը, ընկերությունը խախտել է ֆիքսված հեռախոսացանցի խողովակաշարերում ազատ տարողությունները վարձով տրամադրելու կանոնները։
«Ընկերությունը շուկայի այս հատվածում գերիշխող դիրք է զբաղեցնում, և սահմանված կանոնակարգի համաձայն` այն պետք է 10–օրյա ժամկետում ապահովի կողմնակի օպերատորների միացումը, ինչը և խախտվել է GNC-Alfa ընկերության հայտի դեպքում, որը բավարարվել է 33–օրյա ժամկետում», – ասել է Գևորգյանը։
Ինչպես լրագրողներին տեղեկացրել է «ԱրմենՏել» ՓԲԸ–ի գլխավոր տնօրեն Անդրեյ Պյատախինը, GNC-Alfa ընկերությունը դիմել է «ԱրմենՏել» ընկերությանն իր խողովակաշարի միջոցով մալուխ անցկացնելու խնդրանքով։
«Մենք տեխնիկական պայմաններ ենք տվել կանոնակարգով նախատեսված ժամկետների շրջանակներում, ինչից հետո սկսել ենք նամակագրության միջոցով քննարկել անցկացման պայմանները, որը ձգվել է որոշ գործոնների պատճառով։ Սակայն ՀԾԿՀ–ն ուշադիր հետևում է մեր գործունեությանը և տուգանել է մեզ։ Մենք ընդունում ենք, որ այս դեպքում ժամկետները չեն պահպանվել, և մենք պատրաստ ենք պատասխան տալ դրա համար», – ասել է Պյատախինը։
«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ։
«GNC-ALFA» ՓԲԸ–ն «Ռոստելեկոմ» ԲԲԸ–ի հայկական դուստր ընկերությունն է, որը 2012 թ.–ի դեկտեմբերից Հայաստանի տարածքում «Ռոստելեկոմ» ապրանքանիշի ներքո կապի ծառայությունների վաճառք և առաջխաղացում է սկսել։ 2012 թ.–ի վերջին «Ռոստելեկոմը» իր բաժանորդներին առաջարկել է գերարագ ինտերնետ և IP հեռախոսակապ ($1 – 413,35 դրամ)։ –0-
Ծանոթացեք լուրերին առաջինն ու քննարկեք դրանք մեր Telegram-ում
14:50 14.05.2014