«Գաղափարների գործարան» նոր ծրագիրն է մեկնարկում Երևանում
ԵՐԵՎԱՆ, 18 ապրիլի. /ԱՌԿԱ/. «Լույս» հիմնադրամի, UNISEF–ի և «Թումո» ստեղծարար տեխնոլոգիաների կենտրոնի «Գաղափարների գործարան» (Idea Factory) նոր համատեղ ծրագիրն է մեկնարկում ապրիլի 20–ից Երևանում, «Նովոստի–Արմենիա» գործակալությանը հաղորդեցին «Լույս» հիմնադրամից։
Հաղորդագրության համաձայն` 2013 թ. ապրիլի 20-28-ը «Թումո»-ում կայանալիք սեմինարներին հրավիրված է բելգիացի փորձագետ դ-ր Էտիեն Դելակրուան:
Մասնակիցները պետք է հետևյալ տեխնիկական հիմքն ունենան` համակարգչային գիտելիք, էլեկտրոնիկա, միկրոինժեներիա, էլեկտրական ինժեներիա, ծրագրային մշակում, ծրագրավորում, օպերացիոն համակարգեր (Linux և այլն): Մասնակիցների տարիքը` 15-25:
Ինչպես «ԱՌԿԱ» գործակալությանը հայտնեց «Լույս» հիմանդրամի կրթական ծրագրերի տնօրեն Ժակլին Կարաասլանյանը, ծրագրի և հիմնադրամի նպատակն ընդհանուր առմամբ ստեղծարար և առաջադեմ երիտասարդությանն աջակցելն է։
«Երբ գիտելիքները վերածվում են գործի, դրանք դառնում են հմտություններ։ «Գաղափարների գործարանը» հիմնադրամի կողմից առաջարկած հերթական համատեղ ծրագիրն է»,– ասաց Կարաասլանյանը։
Նա նշեց նաև, որ հիմնադրամը ոչ միայն շարունակում է աջակցել աշխարհի լավագույն բուհերում սովորող հայ ուսանողներին, այլ նաև փորձում է Հայաստան բերել լավագույն գաղափարները, փորձը և ստեղծարար աշխատանքը։
«Լույս» հիմնադրամը հիմնադրվել է 2008թ.–ի ապրիլին` ՀՀ նախագահ Սերժ Սարգսյանի բարձր հովանու ներքո, ով Հիմնադրամի հոգաբարձուների խորհրդի նախագահն է։
Հիմնադրամի նպատակն է աշխարհի լավագույն ուսումնական հաստատություններում Հայաստանի տաղանդավոր ուսանողների ուսման ֆինանսավորումը։
«Լույս» հիմնադրամը նաև զբաղվում է Հայաստանի մարզերում, ինչպես նաև արտերկրի համայնքներում երեխաների համար ծրագրերի և դասընթացների մշակմամբ։ –0–
Ծանոթացեք լուրերին առաջինն ու քննարկեք դրանք մեր Telegram-ում
16:57 18.04.2013
