Արդյունաբերական հատվածի և ՀՊՃՀ–ի փոխգործակցությունը թույլ կտա զարգացնել Հայաստանի բարձր տեխնոլոգիաների ոլորտը. տնօրեն

ԵՐԵՎԱՆ, 15 մայիսի. /ԱՌԿԱ/. Արդյունաբերական հատվածի, կառավարության և Հայաստանի պետական ճարտարագիտական համալսարանի (ՀՊՃՀ) խորը փոխգործակցությունը թույլ կտա զարգացնել Հայաստանի բարձր տեխնոլոգիաների ոլորտը, հայտարարեց Synopsys, Inc. շուկայի ռազմավարական զարգացման գծով փոխնախագահ, «Synopsys Armenia» ընկերության գլխավոր տնօրեն Ռիչ Գոլդմանը։

«Հենց գիտությունը և ազգի ինտելեկտն է երկրի զարգացման երաշխիքը, և Հայաստանի առաջատար տեխնիկական համալսարանի դերն անգնահատելի է որակյալ կադրերի պատրաստման և Հայաստանում բարձր տեխնոլոգիաների ապագայի կառուցման գործում»,– չորեքշաբթի ՀՊԻՀ–ի 18–ամյակին նվիրված «Համալսարանի և արդյունաբերության միջև համագործակցություն. նորարարությունների խթանում» գիտաժողովի ընթացքում ասաց Գոլդմանը։

Գոլդմանն անթույլատրելի է համարում բուհում հին ոճով դասավանդման շարունակությունը և անհրաժեշտություն է տեսնում ուսուցման  նոր, առավել արդյունավետ մեթոդների կատարելագործման և զարգացման հարցում։

«Ոչ մի բուհ չի կարող միայնակ լուծել այդքան բարդ խնդիրը։ Հաջողությունը  բուհի, կառավարության և արդյունաբերական հատվածի խորը փոխգործակցություն է պահանջում»,– ընդգծեց նա։

Գոլդմանը այդ կապակցությամբ նշեց, որ ՀՊՃՀ–ն ուսուցման և կադրերի պատրաստման գործընթացի կատարելագործման նպատակով այսօր հաջող համագործակցում է այնպիսի ընկերությունների հետ, ինչպիսիք են` Synopsis, National Instruments, Microsoft։ Սակայն, ըստ նրա` չի կարելի բավարարվել ձեռք բերվածով, այլ անհրաժեշտ է շարունակել կրթության ոլորտում նորարարությունների ներդրումը։

Գիտաժողովի կազմակերպչական կոմիտեի նախագահ, ՀՊՃՀ շրջանավարտների ասոցիացիայի նախագահ և «Synopsys Armenia» ընկերության գործադիր տնօրեն Հովիկ Մուսայելյանը հաստատեց, որ տեղեկատվական և հեռահաղորդակցական տեխնոլոգիաների ոլորտն առաջնահերթ է Հայաստանի տնտեսության համար և ընդգծեց առաջավոր ՏՏ ընկերությունների սերտ համագործակցության կարևորությունը բուհերի հետ` բարձր պրոֆեսիոնալ կադրեր ստանալու համար։

Գիտաժողովի գլխավոր խնդիրը համալսարանների և արդյունաբերական հատվածի բնագավառում փորձի փոխանակումն է, ինչպես նաև այդ ուղղությամբ նորարարական մոտեցումների ներկայացումը։ Գիտաժողովին մասնակցում է պետական, գիտական կրթական և ձեռնարկատիրական ոլորտների  շուրջ հարյուր ներկայացուցիչներ։

Միջոցառման հովանավորն է Synopsys Inc ընկերությունը և ՀՊՃՀ շրջանավարտների ասոցիացիան։

Գիտաժողովի հովանավորներից մեկը` Synopsys Inc ընկերությունը հայկական շուկա է մտել 2004թ.–ի հոկտեմբերին` որպես Synopsys Armenia ԲԲԸ միասնական ընկերություն Leda Design–ի և Monterey Arset–ի միաձուլման մասին պայմանագրի ստորագրումից հետո։ –0–

Ծանոթացեք լուրերին առաջինն ու քննարկեք դրանք մեր Telegram-ում

13:40 15.05.2013