Հայաստանը համարվում է ՏՏ ոլորտի մեծ ներուժով երկիր. վարչապետ
ԵՐԵՎԱՆ, 14 հունիսի. /ԱՌԿԱ/. Հայաստանն աշխարհում համարվում է ՏՏ ոլորտում մեծ ներուժ ունեցող երկիր, հայտարարեց վարչապետ Տիգրան Սարգսյանը` Հայաստանի պետական ճարտարագիտական համալսարանում Արևելյան Եվրոպայի, Հարավային Կովկասի և Կենտրոնական Ասիայի տարածաշրջանի `«mLab ECA» մոբայլ լուծումների տարածաշրջանային լաբորատորիայի նոր տարածքի բացման ժամանակ։
2011 թվականից այդ լաբորատորիան գործել է «Ձեռնարկությունների ինկուբատոր» Հիմնադրամում (Enterprises Incubator foundation, EIF)։
«Կարևորն այն է, Հայաստանը համաշխարհային քարտեզում նշված է որպես ՏՏ ոլորտում մեծ ներուժ ունեցող երկիր, և այդ ոլորտում կատարվող քայլերը, մասնավորապես, Հայաստանում համաշխարհային ապրանքանիշների կողմից սեփական տարածաշրջանային կենտրոնների և գրասենյակների բացումը դրա վառ ապացույցն է»,– ասաց նա «ԱՌԿԱ» գործակալությանը։
Հայաստանում mLab լաբորատորիան Nokia ընկերության կողմից նախաձեռնած բջջային ներդիրների չորս գործող տարածաշրջանային լաբորատորիաներից մեկն է, այդ թվում, ՀԱՀ–ում, Տանզանիայում և Վիետնամում։
Սարգսյանը նշեց նաև, որ կառավարության համար առաջնահերթ ծրագրերից մեկը Գյումրիի տեխնոպարկի շահագործման հանձնելն է, ինչը թույլ կտա ՏՏ ոլորտի մասնագետներին աշխատել ոչ միայն Երևանում, այլ նաև մարզերում։
Վարչապետը նշեց նաև, որ ՏՏ ոլորտի ներկայացուցիչները ներկայում կառավարության առջև դնում են բուհերի պատրաստած մասնագետների թվի ավելացման խնդիրը, առնվազն, մինչև քսան հազար մարդ։ «Այդ ոլորտը տարեցտարի աճում է 20 տոկոսով, այդ իսկ պատճառով կրթական համակարգը պետք է պատրաստ լինի երիտասարդ կադրեր տալ։ Դա մեր կառավարության գերակայություններից է»,– նկատեց նա։
Վարչապետի խոսքով, մյուս կողմից կառավարության կարևոր խնդիրը ոլորտի օժանդակության համար ենթակառուցվածքի զարգացումն է։ «Այդ տեսանկյունից մենք ապահովել ենք տարածաշրջանում աննախադեպ առաջընթաց վերջին հինգ տարիներին։ Ներկայում Համացանցը հասանելի է բոլորին, գները նվազել են, օգտագործողների թիվն աճել է տասն անգամ, և դա նույնպես Հայաստանում ոլորտի զարգացման կարևոր միջավայր է»,– ասաց Սարգսյանը։
Գյումրիում տեխնոպարկի ստեղծման ծրագիրը ՀՀ կառավարության կողմից հաստատվել է դեռ 2006թ.-ի մարտի 2-ին, իսկ 2009թ.-ի ապրիլի 9-ին կառավարությունը հաստատեց տեխնոպարկի գործունեության պետական աջակցման ծրագիրը։
2012թ.-ի ապրիլի 29-ին սկսվեց Տեխնոլոգիական կենտրոնի՝ տեխնոպարկի գլխավոր մասնաշենքի շինարարությունը, որի շինարարության համար նախատեսված է պետական միջոցներից հատկացնել շուրջ 4,5 մլն դոլար։ Գլխավոր մասնաշենքի շուրջ կձևավորվեն հեռահաղորդակցական և բարձր տեխնոլոգիաների ոլորտի ձեռնարկությունները։ 8,5 մլն դոլար կկազմեն D-Link International համաշխարհային հայտնի ընկերության՝ Հետազոտությունների և թեստավորման կենտրոնի ստեղծման շրջանակներում կատարած ներդրումները։ Տեխնոպարկի ամբողջական գործարկումը նախատեսված է իրականացնել երկու տարվա ընթացքում։
Տեխնոպարկ-ինկուբատորի գործունեության հիմնական ուղղվածություններն ամրագրված են հետևյալ ոլորտներում՝ բարձր և տեղեկատվական տեխնոլոգիաներ, արվեստ, մոդելավորում, ոսկերչություն, զբոսաշրջություն։ Ենթադրվում է, որ տեխնոպարկը հանդես կգա փոքր և միջին ձեռնարկության դերում, որը կզբաղվի գիտատար արտադրությամբ՝ երկրի արտահանման հնարավորություններն ընդլայնելու համար։
Տեխնոպարկի շինարարության աշխատանքների իրականացման համար Գյումրու տնտեսական զարգացման հիմնադրամ է ստեղծվել և մշակվել է տեխնոպարկի տարածքում ազատ առևտրի գոտու զարգացման բիզնես-մոդելը։
Բացի այդ, սարքավորում է ձեռք բերվել САН տեխնոլոգիաների ուսումնական լաբորատորիա հիմնադրելու համար։
National Instruments ամերիկյան ընկերության հետ համատեղ ծրագիր է իրականացվում, որն ուղղված է նորարարությունների և ժամանակակից տեխնոլոգիաների ներդրման աջակցմանը։ Արդեն ավարտվել է մի քանի տասնյակ մասնագետների պատրաստման ծրագիրը, ովքեր արդյունաբերական դիզայնի և եռաչափ մոդելավորման ոլորտում տիրապետում են ժամանակակից համակարգչային մոդելավորման գործիքներին։
Գյումրիում նորաձևության, ոսկեգործության և դիզայնի կենտրոն հիմնելու ուղղությամբ էկոնոմիկայի նախարարությունն ակտիվորեն աշխատում է Հռոմի «Դիզայնի եվրոպական ինստիտուտի» ներկայացուցիչների հետ` նախատեսվում է Գյումրիում բացել համատեղ ուսումնական լաբորատորիա:--0-
Ծանոթացեք լուրերին առաջինն ու քննարկեք դրանք մեր Telegram-ում
11:06 14.06.2013