ԵՐԵՎԱՆ, 13 մարտի. /ԱՌԿԱ/. Հայկական և արտասահմանյան ՏՏ ընկերությունների միջև համագործակցության մասին մի շարք պայմանավորվածություններ են ձեռք բերվել CeBIT խոշորագույն համաշխարհային ցուցահանդեսից հետո, որն անցկացվում էր մարտի 5–9–ը Հանովերում, տեղեկացրեց Հայաստանի Տեղեկատվական տեխնոլոգիաների ձեռնարկությունների միության փոխտնօրեն Վահան Հովսեփյանը։

«Մասնավորապես` պայմանավորվածություն է ձեռք բերվել Ռուսաստանի ՏՏ ասոցիացիայի հետ, որ մեծ ռուսական պատվիրակություն կներկայացվի Digitec բիզնես ֆորումին, որը կանցկացվի հունիսի 14–15–ը Երևանում։ Նաև Հայաստանում անցկացվող ՏՏ ցուցահանդեսներին և բիզնես ֆորումներին մասնակցության հետաքրքրություն են ցուցաբերել մի շարք չինական, լեհական և իսպանական ընկերություններ»,– չորեքշաբթի «Նովոստի» միջազգային մամուլի կենտրոնում ասուլիսի ժամանակ ասաց Հովսեփյանը։

Ըստ նրա` Հայաստանը ցուցահանդեսին ցուցադրեց բարձր տեխնոլոգիական և տեղեկատվական հաղորդակցական տեխնոլոգիաների ոլորտի իր նվաճումները։

«Հայկական պատվիրակության կազմում ցուցահանդեսին մասնակցեցին UITE–ն, «Locator», «Instigate», «X-Tech» ընկերությունները, ինչպես նաև ՏՏ սթարթափերի ասոցիացիան։ Ցուցահանդեսին ներկայացվեց «HiTec Armenia» ապրանքանիշը, մեր պատվիրակությունը գործնական հանդիպումներ անցկացրեց ավելի քան 250 ընկերությունների հետ Գերմանիայից, Ռումինիայից, Լեհաստանից, Ուկրաինայից, Բելառուսից, Ռուսաստանից և այլ երկրներից»,– ասաց նա։

Միաժամանակ Հովսեփյանը նշեց, որ նման ցուցահանդեսների ժամանակ գլխավորը ոչ թե ձեռք բերված պայմանավորվածություններն են, այլ հենց մասնակցության փաստը։

«Այդպիսով, մենք կանգնած ենք տեխնոլոգիական աշխարհի առաջ ինչպես մի երկիր, որը ՏՏ մեծ ներուժ ունի»,– ավելացրեց նա։

Հայաստանի ՏՏ սթարթափերի ասոցիացիայի նախագահ, «Lime-Tech» ընկերության տնօրեն Գևորգ Սաֆարյանն իր հերթին նշեց, որ նման ցուցահանդեսների մասնակցությունը թույլ է տալիս տեղական ընկերություններին տեսնել գլոբալ շուկան, ծանոթանալ համաշխարհային շուկայի հիմնական միտումներին։

«Նման մեծ ցուցահանդեսի ժամանակ մեր տաղավարը, որը զբաղեցնում էր ընդամենը 9 քառակուսի մետր, կարող էր գրավել շատերի ուշադրությունը, և մենք տեսանք, որ մեր արտադրանքը կարող է մրցակցել աշխարհի առաջատար ՏՏ երկրի արտադրանքի հետ»,– ասաց Սաֆարյանը։

Ցուցահանդեսին «Instigate» ընկերությունը ներկայացրեց իր սեփական մշակումները, մասնավորապես` iOS օպերացիոն համակարգով աշխատող սարքերի համար նախատեսված մեդիաձայնագրիչի մուլտիտրեկը, ձեռնարկությունների զարգացման համար ծրագրային լուծումները և այլն։ «X-Tech» –ը ցուցադրեց Kinect հավելվածը և խաղեր, վեբ կայքերի մշակման ծառայություններ, մասնավորապես` բջջային և ցանցային հավելվածների ու էլեկտրոնային առևտրի համար, և իր վերջին CityBugs.am նախագիծը։ «Locator» ընկերությունը ներկայացրեց 3D մոդելավորման, տվյալների փոխանցման, ավտոմեքենաների երթևեկությանը հետևելու նախագծերը։

Հանովերի ցուցահանդեսին որպես հայկական ՏՏ ընկերությունների ուղևորության կազմակերպիչ է հանդես եկել UITE–ն, ինչպես նաև Նիդերլանդների Թագավորության ԱԳՆ` զարգացող երկրներից ներմուծումը խթանող մասնագիտացված գործակալությունը։

Ցուցահանդեսը ոլորտի միտումներին ծանոթանալու, գործնական կապեր հաստատելու և տեխնոլոգիական լուծումներ ներկայացնելու միջազգային հարթակ է: Ամեն տարի CeBIT-ի հարկի տակ ներկայանում են ավելի քան 4 000 ընկերություններ 70 երկրներից, իսկ այցելուների թիվն անցնում է 310 000-ը՝ աշխարհի շուրջ 110 երկրներից: Հայաստանյան ընկերությունները 2000 թվականից ի վեր մի քանի անգամ մասնակցել են CeBIT ցուցահանդեսին:

CeBIT ցուցահանդեսը բաղկացած է վեց թեմատիկ բաժնից` բիզնես գործընթացներ, հաղորդակցություններ, թվային սարքավորում և համակարգեր, բանկային տեխնոլոգիաներ և ֆինանսներ, ապագայի պարկ, Public Sector Parc, որից յուրաքանչյուրն առաջատար է իր բնագավառում։ –0–

Ծանոթացեք լուրերին առաջինն ու քննարկեք դրանք մեր Telegram-ում

15:28 13.03.2013