«Մաքուր տեխնոլոգիաներ ՓՄՁ–ի և start-up–ի համար» ծրագրի շրջանակներում Հայաստանում բիզնես գաղափարների մրցույթ է մեկնարկել
ԵՐԵՎԱՆ, 29 ապրիլի. /ԱՌԿԱ/. «Մաքուր տեխնոլոգիաներ ՓՄՁ–ի և start-up–ի համար» ծրագրի շրջանակներում Հայաստանում բիզնես գաղափարների մրցույթ է մեկնարկել։
Ինչպես տեղեկացրել է մրցույթի կազմակերպիչ, «Մաքուր տեխնոլոգիաներ ՓՄՁ–ի և start-up–ի համար» ծրագրի ազգային համակարգող Ֆրունզիկ Ոսկանյանը, մրցույթի նպատակն է բացահայտել նոր բիզնես գաղափարներ և դրանց հիման վրա ձևավորել start-up ընկերություններ, որոնք գործում են նորարար տեխնոլոգիաների հիման վրա։
«Ակնկալում ենք, որ մրցույթին կներկայացվեն մոտ 80 բիզնես գաղափարներ և նախատիպեր մաքուր տեխնոլոգիայի ոլորտում, մասնավորապես` էներգաարդյունավետության, վերականգնվող էներգետիկայի, թափոններից, ջրային ռեսուրսներից էներգիա ստանալու ոլորտներում», – ասել է Ոսկանյանը։
Նրա խոսքերով` ներկայացված նախագծերից կընտրվեն 25 լավագույնները, որոնց հեղինակներին կտրամադրվի անհրաժեշտ խորհրդատվական աջակցություն` գաղափարը կոնկրետ բիզնես մոդելի վերածելու համար։
Նա նշել է, որ մրցույթի եզրափակիչը տեղի կունենա հոկտեմբերի 16–17–ին, որի ժամանակ կընտրվեն չորս լավագույնները, որոնք մինչև 10 հազար դոլարի չափով դրամական մրցանակներ կստանան, իսկ դրանցից մեկը կճանաչվի մրցույթի ազգային հաղթող և հնարավորություն կստանա մասնակցել Սիլիկոնային հովտում անցկացվող Cleantech Open ամենամյա բիզնես–ֆորումին, որտեղ կներկայացնի իր նախագիծը պոտենցիալ ներդրողներին։
Ինչպես նշել է «Ձեռնարկությունների ինկուբատոր» հիմնադրամի տնօրեն Բագրատ Ենգիբարյանը, ճարտարագիտության և մաքուր էներգետիկայի ոլորտը բավականին ակտիվ զարգանում է Հայաստանում, իսկ կազմակերպվող մրցույթը թույլ կտա Հայաստանում ստեղծել ինկուբացիոն մթնոլորտ` բնագավառի զարգացման համար։
Ծրագիրն իրականացվում է Սիլիկոնային հովտում Cleantech Open–ի աքսելերատորի մոդելի հիման վրա, իսկ որպես ազգային գործընկերներ են հանդես գալիս «Ձեռնարկությունների ինկուբատոր» հիմնադրամն ու Փոքր և միջին բիզնեսի զարգացման աջակցության ազգային կենտրոնը։
Մրցույթի մասին մանրամասներին, ինչպես նաև մասնակցության հայտին կարելի է ծանոթանալ Armenia.cleantechopen.org կայքում։
Հայաստանը Արևելյան Եվրոպայի առաջին երկրներից էր, որը միացավ «Մաքուր տեխնոլոգիաներ ՓՄՁ–ի և start-up–ի համար» գլոբալ ծրագրին, որն իրականացվում է UNIDO–ի կողմից Գլոբալ բնապահպանական հիմնադրամի ֆինանսավորմամբ։ Հայաստանը ծրագրին միացել է 2013 թ.–ին (տևողությունը 3 տարի է)։ Ծրագիրն ուղղված է մաքուր տեխնոլոգիաների ոլորտում ՓՄՁ–ների և start-up ընկերությունների ուժեղացմանն ու ստեղծմանը, ինչպես նաև ոլորտում նորարարությունների խթանման քաղաքականության զարգացմանը։–0–
Ծանոթացեք լուրերին առաջինն ու քննարկեք դրանք մեր Telegram-ում
19:24 29.04.2014