Digitec Expo իններորդ ամենամյա ցուցահանդեսին մասնակցության հայտ է ներկայացրել 60 ընկերություն
ԵՐԵՎԱՆ, 29 օգոստոսի. /ԱՌԿԱ/. Իններորդ Digitec Expo 2013 միջազգային ցուցահանդեսին, որն այս տարի կկայանա հոկտեմբերի 4-6-ը Երևանում, արդեն մասնակցության հայտ է ներկայացրել 60 ընկերություն, հաղորդում է Ինֆորմացիոն տեխնոլոգիաների ձեռնարկությունների միության մամուլի ծառայությունը:
Ակնկալվում է, որ ցուցահանդեսին կմասնակցի 150 կազմակերպություն` անցած տարվա 120-ի համեմատ, իսկ այցելուների քանակը կհասնի 26 հազ-ի` 2012 թ. 24 հազ-ի փոխարեն։
Մասնակցության հայտ ներկայացրած ընկերությունների թվում են` ՋԻԷՆՍԻ-ԱԼՖԱ ընկերությունը «Ռոստելեկոմ» ապրանքանիշով, «Քուեսթրեյդ Ինթերնեյշնլ Ինկ.», «Նեյշնլ Ինսթրումենթս», «Սինոփսիս», «Յունիքոմփ», «Մայքրոսոֆթ», «Լոկատոր», «Լանար Սերվիս», «Հիբրիդ Սոլյուշնս», «Աստրոմափս», «Ինսթիգեյթ», «Սիներջի Ինթրնեշնըլ Սիսթըմզ», «ՎեբԴոռադո», «Թվային Նուռ» ընկերությունները, Ձեռնարկությունների Ինկուբատոր Հիմնադրամը, Երևանի Կապի միջոցների գիտահետազոտական ինստիտուտը, «Անանիա Շիրակացի» կրթահամալիրը, Հայաստանի Ամերիկյան Համալսարանը և այլ կազմակերպություններ:
Digitec Expo միջազգային տեխնոլոգիական ցուցահանդեսի հիմնական նպատակն է ստեղծել հաղորդակցման բարենպաստ միջավայր բարձր տեխնոլոգիաների ընկերությունների, գործարար սպառողների և հասարակության միջև: Ցուցահանդեսը հայաստանյան տեղեկատվական, հեռահաղորդակցության տեխնոլոգիաների և բարձր տեխնոլոգիաների (ՏՀՏ/ԲՏ) ոլորտների իրական պատկերն ուսումնասիրելու, ձեռքբերումներին ծանոթանալու, առկա մարտահրավերներն ու հնարավորությունները տեսնելու հնարավորություն է տալիս:
ԴիջիԹեք ցուցահանդեսը, որի կազմակերպիչն է Ինֆորմացիոն Տեխնոլոգիաների Ձեռնարկությունների Միությունը, կանցնի Հայաստանի վարչապետ Տիգրան Սարգսյանի հովանու ներքո։ Միջոցառման պլատինե հովանավորն է ՋԻԷՆՍԻ-ԱԼՖԱ ընկերությունը «Ռոստելեկոմ» ապրանքանիշով, իսկ պաշտոնական հովանավորն է` «Քուեսթրեյդ Ինթերնեյշնլ Ինկ.»-ը:--0--
Ծանոթացեք լուրերին առաջինն ու քննարկեք դրանք մեր Telegram-ում
19:26 29.08.2013
