Ավելի քան 120 հայկական և արտասահմանյան ընկերություններ կմասնակցեն «DigiTec Expo 2013»–ի շրջանակներում

ԵՐԵՎԱՆ, 2 հոկտեմբերի. /ԱՌԿԱ/. Ավելի քան 120 ընկերություններ, այդ թվում 90 տեղական և ավելի քան 30 արտասահմանյան, կմասնակցեն Երևանում անցկացվող «DigiTec Expo 2013» իններորդ տեխնոլոգիական ցուցահանդեսին, ասել է Տեղեկատվական տեխնոլոգիաների ձեռնարկությունների միության (UITE) գործադիր տնօրեն Կարեն Վարդանյանը։

Միջոցառումը կանցկացվի հոկտեմբերի 4–6–ը Էքսպո–կենտրոնում, որը գտնվում է Երևանի Մերգելյանի անվան ինստիտուտի տարածքում։

«Ցուցահանդեսի նկատմամբ ոչ միայն ներքին, այլև արտաքին հետաքրքրության առկայությունը խոսում է այն մասին, որ շատ ընկերություններ դիտարկում են Digitec–ը որպես դեպի հայկական ՏՏ–հատված տանող դարպաս», – չորեքշաբթի «Նովոստի» միջազգային մամուլի կենտրոնում ասել է Վարդանյանը։

Ինչպես նշել է միության նախագահը, այս տարի օտարերկրյա ընկերություններից ցուցահանդեսին իրենց նորարարությունները կներկայացնեն Ռուսաստանի, Սինգապուրի, Ամերիկայի, Կանադայի ընկերությունները։

Նրա խոսքերով` կազմակերպիչներն ակնկալում են, որ այս տարի ցուցահանդեսի այցելուների թիվը կհասնի 26 հազարի` նախորդ տարվա 24 հազարի փոխարեն։

Վարդանյանը նշել է նաև, որ այս տարի ընկերությունների ակտիվությունը թույլ է տվել իրականացնել ցուցահանդեսային տարածքների սեգմենտավորում և բաժանել դրանք մասնագիտական գոտիների` ինժեներական, ՏՏ–ծրագրավորում, համակարգային ինտեգրատորներ, սարքավորումներ արտադրողներ։

Միաժամանակ ցուցահանդեսի համակազմակերպիչ, USAID–ի Ձեռնարկատիրության և շուկայի մրցունակության զարգացման  ծրագրի (EDMC) տեղեկատվական և բարձր տեխնոլոգիաների ավագ փորձագետ Լևոն Գալստյանը նշել է, որ առանձին աջակցություն կցուցաբերվի Start-up ընկերություններին։

«Ցուցահանդեսին ներկայացված լուծումներն ու նորարարությունները թույլ են տալիս հասկանալ ոլորտում առկա միտումները, ինչպես նաև բացել ներքին շուկայում հայկական ՏՏ–արտադրանքի գործնական կիրառման նոր հնարավորություններ և սահմաններ», – ասել է Գալստյանը։

Նա նաև տեղեկացրել է, որ այս տարի ցուցահանդեսի ժամանակ գործելու է հատուկ առանձնացված տարածք պոտենցիալ գործընկերների (B2B) միջև բանակցությունների համար` ավելի բարձր գործնական արդյունքներ ձեռք բերելու նպատակով։

Միջոցառումը, որի կազմակերպիչն է Ինֆորմացիոն տեխնոլոգիաների ձեռնարկությունների միությունը, կանցնի Հայաստանի վարչապետ Տիգրան Սարգսյանի հովանու ներքո USAID–ի Ձեռնարկատիրության և շուկայի մրցունակության զարգացման  ծրագրի (EDMC) աջակցությամբ։ Միջոցառման պլատինե հովանավորն է ՋԻԷՆՍԻ-ԱԼՖԱ ընկերությունը` «Ռոստելեկոմ» ապրանքանիշով, իսկ պաշտոնական հովանավորն է` «Քուեսթրեյդ Ինթերնեյշնլ Ինկ.»–ը, հովանավորն է Satis–ը։ Տեղեկատվական հովանավորներից մեկը «ԱՌԿԱ» գործակալությունն է։

Ինֆորմացիոն տեխնոլոգիաների ձեռնարկությունների միությունը հիմնադրվել է 2000թ.` որպես Հայաստանում գործող տեղեկատվական և հեռահաղորդակցական տեխնոլոգիաների ոլորտի ձեռնարկությունների բիզնես ասոցիացիա: ԻՏՁՄ-ն ստեղծվել է ոլորտի ձեռնարկությունների շահերի պաշտպանության, բիզնեսի խթանման նպատակով: - -0—

Ծանոթացեք լուրերին առաջինն ու քննարկեք դրանք մեր Telegram-ում

13:55 02.10.2013