Հայաստանի ՏՏ ոլորտի աճի տարեկան տեմպը կազմում է 15-20%. վարչապետ
ԵՐԵՎԱՆ, 4 հոկտեմբերի. /ԱՌԿԱ/. Հայաստանի տեղեկատվական տեխնոլոգիաների ոլորտի աճի տարեկան տեմպը կազմում է 15–20 տոկոս, ուրբաթ ArmTech միջազգային կոնգրեսի ընթացքում հայտնեց ՀՀ վարչապետ Տիգրան Սարգսյանը։
Ըստ նրա` այսօր Հայաստանում ՏՏ ոլորտում ընդգրկված է շուրջ 7 հազար մասնագետ, ովքեր աշխատում են մոտ 300 ձեռնարկությունում։
«Ուրախ ենք, որ այսօր Հայաստանում աշխատում են այնպիսի առաջատար ընկերություններ, ինչպիսին են` Microsoft–ը, IBM–ը, Synopsys–ը և այլն։ Միաժամանակ ուզում եմ նշել, որ մենք մտնում ենք ՏՏ զարգացման նոր ժամանակաշրջան և պետք է մեր առջև հստակ խնդիրներ դնենք»,– ասաց Սարգսյանը։
Այդ կապակցությամբ նա ընդգծեց, որ կառավարությունը պետք է այնպիսի միջավայր ստեղծի ՏՏ ոլորտի շուրջ, որտեղ արդյունավետորեն կգործածվեն չորս հիմնական սուբյեկտներ, որոնք անհրաժեշտ են ոլորտի զարգացման համար` համալսարաններ, հետազոտական կենտրոններ, վենչուրային հիմնադրամներ և մենեջերներ։
«Մենք նաև պարտավոր ենք գտնվել համաշխարհային ՏՏ ցանցում։ Այդ պատճառով կարևոր էր անցյալ տարի Սիլիկոնյան հովտում Հայաստանի ներկայացուցչության բացումը»,– ավելացրեց նա։
ArmTech տեխնոլոգիական միջազգային վեցերորդ կոնգրեսն անցնում է ուրբաթ Երևանում։
Առաջին ԱրմԹեք Համաժողովն անցկացվել է 2007թ. ԱՄՆ-ի Կալիֆորնիա նահանգի Սան-Ֆրանցիսկո քաղաքում, որին հաջորդել են համաժողովներ Երևանում 2008-ին և 2011-ին և Սիլիկոնյան հովտում ՝ 2009-ին և 2012-ին:
2000 թվականին Հայաստանի կառավարությունը ՏՏ ոլորտը հայտարարեց երկրի տնտեսության գերակա ոլորտ։ Այսօր Հայաստանի ՏՀՏ ոլորտում գործում է մոտ 350 ձեռնարկություն, որտեղ աշխատում է շուրջ 10 հազար աշխատակից։
Ըստ Ինֆորմացիոն տեխնոլոգիաների ձեռնարկությունների միության (UITE) տվյալների, Հայաստանում 2012թ.–ի արդյունքներով ՏՏ ոլորտի աճը կազմել է 25 տոկոս` 250 մլն դոլար շրջանառությամբ։ –0–
Ծանոթացեք լուրերին առաջինն ու քննարկեք դրանք մեր Telegram-ում
16:18 04.10.2013