ՏՏ դիզայնի համաշխարհային շուկայի և միկրոսխեմաների մշակման շուրջ 5 տոկոսը բաժին է հասնում Հայաստանին. Սարգսյան

ԵՐԵՎԱՆ, 4 հոկտեմբերի. /ԱՌԿԱ/. Տեխնոլոգիական դիզայնի համաշխարհային շուկայի և միկրոսխեմաների մշակման շուրջ 5 տոկոսը բաժին է հասնում Հայաստանին, ուրբաթ ArmTech միջազգային կոնգրեսի ընթացքում հայտնեց ՀՀ վարչապետ Տիգրան Սարգսյանը։

«Սա մեծ ցուցանիշ է Հայաստանի համար»,–ասաց Սարգսյանը` պարզաբանելով, որ այդ մասին ընդգծվել է Սիլիկոնյան հովտում ArmTech նախորդ կոնգրեսի ընթացքում։

Այդ կապակցությամբ նա ընդգծեց, որ Հայաստանը պետք է համապատասխան դեր զբաղեցնի համաշխարհային տեխնոլոգիական շուկայում։

«Ժամանակն է հասկանալ, թե ինչ նեղ մասնագիտացում պետք է ընտրի Հայաստանը, որպեսզի համապատասխան դեր զբաղեցնի համաշխարհային շուկայում»,– նշեց նա։

ArmTech տեխնոլոգիական միջազգային վեցերորդ կոնգրեսն անցնում է ուրբաթ Երևանում։

Առաջին ԱրմԹեք Համաժողովն անցկացվել է 2007թ. ԱՄՆ-ի Կալիֆորնիա նահանգի Սան-Ֆրանցիսկո քաղաքում, որին հաջորդել են համաժողովներ Երևանում 2008-ին և 2011-ին և Սիլիկոնյան հովտում ՝ 2009-ին և 2012-ին:

2000 թվականին Հայաստանի կառավարությունը ՏՏ ոլորտը հայտարարեց երկրի տնտեսության գերակա ոլորտ։ Այսօր Հայաստանի ՏՀՏ ոլորտում գործում է մոտ 350 ձեռնարկություն, որտեղ աշխատում է շուրջ 10 հազար աշխատակից։

Ըստ Ինֆորմացիոն տեխնոլոգիաների ձեռնարկությունների միության (UITE) տվյալների, Հայաստանում 2012թ.–ի արդյունքներով ՏՏ ոլորտի աճը կազմել է 25 տոկոս` 250 մլն դոլար շրջանառությամբ։ –0–

Ծանոթացեք լուրերին առաջինն ու քննարկեք դրանք մեր Telegram-ում

16:05 04.10.2013