ՏՏ ոլորտի պետական աջակցության մասին նոր օրինագիծը թույլ կտա ամեն տարի ստեղծել մինչև 60 նոր ընկերություն. նախարար

ԵՐԵՎԱՆ, 13 մարտի. /ԱՌԿԱ/. «Տեղեկատվական տեխնոլոգիաների ոլորտում պետական աջակցության մասին» օրինագիծը, որը հավանության է արժանացել հինգշաբթի ՀՀ կառավարության կողմից, կնպաստի ամեն տարի ՏՏ ոլորտում 40–60 նոր ընկերությունների ստեղծմանը, ասել է հանրապետության էկոնոմիկայի նախարար Վահրամ Ավանեսյանը։ 

Գործադիր իշխանությունն օրենքն անհետաձգելի է համարել։ ՀՀ կառավարությունը հինգշաբթի նիստի ժամանակ հավանության է արժանացրել նաև «Եկամտահարկի մասին» և «Շահույթի մասին օրենքում» կատարված փոփոխությունները։  

«Եվ, որ ամենակարևորն է, մտավոր սեփականության ապրանքները, որոնք ստեղծվել են երիտասարդ ձեռներեցների կողմից, արդեն կունենան հայկական ծագում», – հայտարարել է Ավանեսյանը կառավարության նիստի ընթացքում։ 

«Այս նախագծով կառավարությունը նախատեսում է ներդնել աջակցության նոր գործիք տեղեկատվական տեխնոլոգիաների ոլորտում։ Խոսքը StartUp-երի մասին է, որոնք ունեն շուրջ 15 աշխատակից և գործում են շուրջ 3 տարի», – ավելացրել է նա։ 

Նախարարը նշել է, որ աջակցությունը կցուցաբերվի երկու հիմնական ուղղություններով` կառավարության հաստատած ծրագրերի շրջանակներում տարբեր գործիքների օգնությամբ տեխնիկական և դրամաշնորհային աջակցության տրամադրում, ինչպես նաև հարկային արտոնությունների տրամադրում։ Մասնավորապես, StartUp ընկերությունները կազատվեն եկամտահարկից, իսկ շահութահարկը կլինի 10 տոկոսի չափով։ 

ՀՀ վարչապետ Տիգրան Սարգսյանն իր հերթին նշել է, որ այս գաղափարը ծնվել է դեկտեմբերին Դիլիջանում կայացած բիզնես ինովացիաների ֆորումի ընթացքում, որտեղ խոսք էր տրվել, որ կառավարությունը սեղմ ժամկետներում օրինագիծ կմշակի և կներկայացնի այն հանրությանը։ 

«Ցանկանում եմ նաև նշել, որ մենք այդ օրինագիծը ներկայացրել ենք նախագահին և ստացել նրա հավանությունը, քանի որ այս լուծումն ունի քաղաքական բովանդակություն` տեղեկատվական տեխնոլոգիաների ոլորտն այս պահին իր զարգացմամբ հասել է այնպիսի մակարդակի, որտեղ հարկավոր են որակապես նոր փոփոխություններ, որպեսզի Հայաստանը իր համեմատական առավելությունների շնորհիվ զբաղեցնի իր ուրույն տեղը համաշխարհային տեղեկատվական տեխնոլոգիաների քարտեզի վրա», – ավելացրել է նա։–0–