Կորեացի փորձագետները ՏՏ ոլորտի զարգացման փորձի փոխանակում կանցկացնեն հայ կոլեգաների հետ
ԵՐԵՎԱՆ, 11 հուլիսի. /ԱՌԿԱ/. Կորեայի կառավարության փորձագետները հուլիսի 13-ին Երևանում սեմինար կանցկացնեն, որի ընթացքում կներկայացնեն տեղեկատվական տեխնոլոգիաների և էլեկտրոնային հանրության ձևավորման ոլորտի զարգացման կորեական փորձը, «ԱՌԿԱ» գործակալությանը հաղորդեցին «Ձեռնարկությունների ինկուբատոր» հիմնադրամի (Enterprises Incubator Foundation - EIF) մամուլի ծառայությունից։
Սեմինարը կազմակերպված է Կորեայի կառավարության և «Ձեռնարկությունների ինկուբատոր» հիմնադրամի կողմից՝ ՍԾՏՀԿ շրջանակներում համագործակցության հիման վրա։
Սեմինարի ընթացքում կներկայացվեն հետևյալ թեմաները՝ էլեկտրոնային կառավարության ստեղծում, էլեկտրոնային կառավարման ռազմավարություն և ՏՏ ոլորտի զարգացում, GIDC (Government Integration Data Center), մոբիլ լուծումներ։
Սեմինարի բացմանը ներկա կգտնվի ՀՀ էկոնոմիկայի փոխնախարար Կարինե Մինասյանը։
Նախկինում «Ձեռնարկությունների ինկուբատոր» հիմնադրամի տնօրեն Բագրատ Ենգիբարյանը տեղեկացրել էր, որ Կորեայի և Չինաստանի կառավարությունները ներկայում դիտարկում են Հայաստանում տեղեկատվական տեխնոլոգիաների ոլորտում գերազանցության հայ-հնդկական կենտրոնի մոդելով կենտրոնների ստեղծման հնարավորությունը։ --0--
Ծանոթացեք լուրերին առաջինն ու քննարկեք դրանք մեր Telegram-ում
14:43 11.07.2012
