Առաջին հայկական ArmTab պլանշետները պաշտոնապես ներկայացվել են Երևանում (լուսանկարներ)

ԵՐԵՎԱՆ, 4 փետրվարի. /ԱՌԿԱ/. Առաջին հայկական ArmTab պլանշետները երեքշաբթի պաշտոնապես ներկայացվել են Երևանոմ։

Ինչպես շնորհանդեսի ընթացքում ներկայացրեց Technology and Science Dynamics Inc.–ի հիմնադիր Վահան Շաքարյանը, ընկերությունը դիմել է ՀՀ կառավարությանը ընդամենը մեկուկես ամիս առաջ Ազատ տնտեսական գոտում գործունեություն իրականացնելու արտոնագիր տրամադրելու խնդրանքով և բավականին օպերատիվ ստացել է բոլոր անհրաժեշտ փաստաթղթերը։

«Մենք նախատեսում ենք առաջիկա մի քանի ամսվա ընթացքում ավարտել գործարանի շինարարությունն ու ArmTab և Minno պլանշետների արտադրություն սկսել Հայաստանում», – ասաց Շաքարյանը։

Նրա խոսքով` հայկական պլանշետի համար հարկավոր բոլոր դետալները դեռևս ներկրվում է, սակայն նրա վրա տեղադրված ծրագրային ապահովումը հայ մասնագետների մշակումն է։

Նա նշել է, որ պլանշետներում տեղադրված է «Արաքս» առաջին հայկական օպերացիոն համակարգը և «Ոստան» աշխատանքային տիրույթը, որոնք մշակվել են Instigate ընկերության կողմից։ Նրանք փորձարկվել են և լիարժեք աշխատում են ArmTab պլանշետների վրա։
«Շուտով մենք նախատեսում ենք ArmTab–ի արտաքին դիզայնի, motherboard–ի դիզայնի, ծրագրային ապահովագրման աշխատանքներն իրականացնել բացառապես Հայաստանում, քանի որ փորձը ցույց է տալիս, որ հայ ծրագրավորողները տրամադրում են բարձրորակ արտադրանք, որը չի զիջի իր համաշխարհային նմանակներին», – ասաց Շաքարյանը։

Միաժամանակ ընկերության ղեկավարը չնշեց գնային քաղաքականությունը, որը տարածվելու է ընկերության արտադրանքի վրա։
Նա նաև տեղեկացրեց, որ ընկերությունը ոչ միայն ստացել է իշխանությունների համակողմանի աջակցությունը, այլև մտադիր է ՀՀ ԿԳՆ–ի հետ համատեղ իրականացնել 2015 թ.–ից հայ դպրոցականներին պլանշետների տրամադրման ծրագիրը։

Technology and Science Dynamics Inc.–ը Հայաստանի ազատ տնտեսական գոտում գրանցված առաջին ՏՀՏ  ընկերությունն է։
Technology and Science Dynamics Inc.–ը հիմնադրվել է 2013 թվականի հոկտեմբերի 11-ին և զբաղվում է հայկական առաջին դյուրակիր համակարգիչների՝ պլանշետների արտադրությամբ: Արտադրության շրջանակում արդեն կան անդրոիդ համակարգով փորձնական հավաքված պլանշետ (Armtab) և առաջին հայկական հեռախոս (Armphone): Պլանշետի ծրագրային և սարքային ապահովման դիզայնն իրականացվում է Հայաստանում, իսկ հավաքումը` ԱՄՆ-ում և Հոնկոնգում:

«Technology and Science Dynamics Inc/Armtab Technology» պլանշետ արտադրող ընկերությունը կառավարության որոշմամբ ստացել է գործունեության ծավալման սկզբնական թույլտվություն ազատ տնտեսական գոտում` «ՌԱՕ ՄԱՐՍ» ՓԲԸ–ի տարածքում` 3 տարի ժամկետով։ Նախագծում կատարվող ընդհանուր ներդրումներն առաջիկա 3 տարիներին կկազմեն մոտ 6.7 մլն դոլար։ Համաձայն բիզնես–ծրագրի, ընկերությունը պլանշետներ կհավաքի և ծրագրեր կտեղադրի։ Աշխատանքի առաջին տարում ընկերությունը պատրաստվում է վաճառել 10 հազար պլանշետ, իսկ երկրորդ և երրորդ տարիներին, համապատասխանաբար, 30 և 50 հազար պլանշետ։ Աստիճանաբար Հայաստան կտեղափոխվեն պլանշետների մշակման և արտադրության բոլոր փուլերը։ Ընկերությունում չեն բացառել նաև ստորաբաժանման ստեղծումն ԱՏԳ–ից դուրս` հայկական ներքին շուկայի հետ աշխատելու համար։ --0—

Ծանոթացեք լուրերին առաջինն ու քննարկեք դրանք մեր Telegram-ում

17:51 04.02.2014