Երևանում բացվել է Digitec Expo 2014 10-րդ հոբելյանական ցուցահանդեսը
ԵՐԵՎԱՆ, 3 հոկտեմբերի. /ԱՌԿԱ/. «Երևան Էքսպո» ցուցահանդեսային համալիրում բացվել է Digitec Expo 2014 10-րդ հոբելյանական տեխնոլոգիական ցուցահանդեսը:
Ցուցահանդեսը կտևի մինչև հոկտեմբերի 5-ը։ Ցուցահանդեսի բացմանը ներկա էր ՀՀ նախագահ Սերժ Սարգսյանը, ով ծանոթացել է ներկայացված մշակումներին և նորույթներին, ՏՏ ընկերությունների առաջարկած նոր ծառայություններին, ցուցահանդեսի մասնակիցների հետ քննարկել է նրանց գործունեությանը, խնդիրներին և հետագա զարգացման ծրագրերին վերաբերող հարցերը:
Digitec Expo ցուցահանդես-փառատոնը Հայաստանի տեխնոլոգիական ոլորտի ամենագլխավոր և ներկայացուցչական իրադարձությունն է: Այս տարի այցելուներին կներկայացվի ցուցահանդեսի 13 բաժին:
Ինչպես լրագրողներին տեղեկացրել է Ինֆորմացիոն տեխնոլոգիաների ձեռնարկությունների միության գործադիր տնօրեն Կարեն Վարդանյանը, Digitec Expo 2014 տեխնոլոգիական ցուցահանդեսին մասնակցում է 150 ընկերությունն, որոնցից 120-ը կներկայացնեն իրենց արտադրանքը: Նախնական գնահատականներով՝ այցելուների թիվը կկազմի 30 հազար:
Նրա խոսքերով՝ արդեն ավանդական դարձած միջազգային տեխնոլոգիական ցուցահանդեսը լավագույն հարթակներից մեկն է պրոֆեսիոնալ կողմնորոշման համար, որտեղ ներկայացված են ամենաժամանակակից լուծումներն ու տեխնոլոգիական կրթության մեթոդները:
«DigiTec-ը նաև «ձեռքը զարկերակի վրա պահելու» հնարավորություն է, տեխնոլոգիական նորույթներից տեղյակ լինելու հնարավորություն, քանի որ տեխնոլոգիական ընկերություններն ամեն տարի փորձում են ինչ-որ նոր բան ավելացնել», - ասել է Վարդանյանը:
Նա նշել է, որ այս տարի Digitec-ի հատուկ ուշադրություն կենտրոնում երեխաներն ու երիտասարդներն են, ինչի կապակցությամբ ցուցահանդեսի տարբեր հարթակներում զուգահեռաբար անցկացվում է երկու միջոցառում՝ «Ռոբոտները կենցաղում» փառատոնն ու Hackathon նորարար գաղափարների և ծրագրավորման մրցույթը:
«Ռոբոտները կենցաղում» փառատոնի շրջանակում կներկայացվեն ռոբոտաշինության 60 խմբակների երեխաների աշխատանքները, իսկ Hackathon նորարար գաղափարների և ծրագրավորման մրցույթի հարթակում թիմերը մրցում են համակարգչային խաղերի մշակման գործում:
«Ձեռնարկությունների ինկուբատոր» հիմնադրամը ցուցահանդեսին ներկայացնում է Գերազանցության հայ-հնդկական կենտրոնը, Ազգային ինժեներական լաբորատորիան (ANEL), Microsoft ինովացիոն կենտրոնը, mLab ECA շարժական հավելվածների տարածաշրջանային լաբորատորիան, Գյումրու տեխնոլոգիական կենտրոնը: Instigate ընկերությունը ներկայացնում է կրթության նկատմամբ նոր մոտեցումներ:
Հեռուսատեսության և ինտերնետի ոլորտում իր առաջատար լուծումներ է ներկայացնում Ucom ընկերությունը:
Անցկացվում է նաև թափուր աշխատատեղերի տոնավաճառ, որի շրջանակում տեխնոլոգիական ընկերությունները ներկայացնում են իրենց թափուր աշխատատեղերը և հարցազրույցներ են անցկացնում:
Ցուցահանդեսն անցկացվում է ՀՀ վարչապետի բարձր հովանու ներքո, ցուցահանդեսի կազմակերպիչը Ինֆորմացիոն տեխնոլոգիաների ձեռնարկությունների միությունն է:
Գլխավոր հովանավորն է Ucom ընկերությունը: «ԱՌԿԱ» գործակալությունը ցուցահանդեսի ինֆորմացիոն հովանավորն է:
Հայաստանի Ինֆորմացիան տեխնոլոգիաների ձեռնարկությունների միությունը (UITE) հիմնվել է 2000 թվականին տվյալ բնագավառի ընկերությունների տնտեսական շահերը պաշտպանելու, բիզնեսի զարգացումը խթանելու, ՏՏ ոլորտի հետազոտությունները խրախուսելու համար։ Միությունում ներառված են տասնյակ ընկերություններ, որոնք ներկայացնում են Հայաստանի բարձր և տեղեկատվական տեխնոլոգիաների ոլորտը:-0-
Ծանոթացեք լուրերին առաջինն ու քննարկեք դրանք մեր Telegram-ում
17:02 03.10.2014