Հայաստանում բիզնես ինովացիոն առաջին միջազգային ֆորումը կոչված է ներդրումներ գրավել դեպի երկիր. կազմակերպիչ

ԵՐԵՎԱՆ, 22 նոյեմբերի. /ԱՌԿԱ/. Հայաստանում բիզնես ինովացիոն առաջին միջազգային ֆորումը (BIF) նպատակաուղղված է բիզնես համագործակցության հաստատմանն ու դեպի երկիր ներդրումներ գրավելուն, ասաց միջոցառման կազմակերպիչ Հայաստանի ինֆորմացիոն տեխնոլոգիաների ձեռնարկությունների միության (UITE) գործադիր տնօրեն Կարեն Վարդանյանը։

Ֆորումը, որը կանցկացվի Դիլիջանում նոյեմբերի 29–ից դեկտեմբերի 1–ը, կազմակերպվել է ՀՀ վարչապետ Տիգրան Սարգսյանի բարձր հովանու ներքո։

BIF–ին կմասնակցեն բիզնեսի մոտ 150–200 տեղացի և արտասահմանցի ներկայացուցիչներ Ռուսաստանից, ԱՄՆ–ից և Իսրայելից։ Ֆորումին կայցելեն նաև Ռուսաստանի մարզերի գործարարները։ Հիմնական ոլորտները, որտեղ զբաղված են ֆորումի մասնակիցները, բարձր տեխնոլոգիաների հատվածն է, բանկային ոլորտը, ինչպես նաև ընկերությունների հատվածը, որոնք զբաղվում են բիզնեսի արդյունավետության բարձրացման համար նախատեսված ապրանքների արտադրությամբ։

«Ֆորումի անցկացման նպատակը տեխնոլոգիական բիզնեսի և ձեռներեցության այլ ձևերի ներկայացուցիչների հանդիպումների ու համագործակցության համար հարթակի ստեղծումն է։ Ֆորումը նպատակաուղղված է ներդրումների ներգրավմանը` հաշվի առնելով Հայաստանում գոյություն ունեցող ոչ բավարար ներդրումային մուտքերի խնդիրը բարձր տեխնոլոգիաների ոլորտի զարգացման բավականին բարձր մակարդակի պայմաններում», – ասաց Վարդանյանը «Նովոստի» միջազգային մամուլի կենտրոնում ուրբաթ  տեղի ունեցած մամուլի ասուլիսի ժամանակ։

Նրա խոսքերով` ներդրումների բացը լրացնելու համար օգտագործվում է մի քանի մեխանիզմ, որոնց թվում են` նման ֆորումների ժամանակ տարբեր ոլորտներում գործող գործարարներին տեխնոլոգիական լուծումների տրամադրումը, ներդրումների ներգրավման թեմայով քննարկումների կազմակերպումը, ինչպես նաև միջազգային համագործակցության հաստատման հարցերի քննարկումը։

Հայաստանում Ռոսսոտրուդնիչեստվոյի ներկայացուցչության ղեկավարի պաշտոնակատար Մարկ Կալինինն իր հերթին նշեց, որ Ռոսսոտրուդնիչեստվոն, լինելով ԱՊՀ երկրների նորարար համագործակցության միջպետական նպատակային ծրագրի մասնակից, աջակցում է ֆորումի անցկացմանը։ Մինչև 2020 թվականը նախատեսված ծրագիրը ընդունվել է 2011 թ.–ի հոկտեմբերի 18–ին Սանկտ Պետերբուրգում ԱՊՀ կառավարությունների ղեկավարների խորհրդի որոշմամբ։

«Այս ծրագիրը նորարարության ոլորտում միջպետական համագործակցության զարգացում է նախատեսում։ Ռոսսոտրուդնիչեստվոյի ներկայացուցչությունը դեռևս 2010 թ.–ին իր բազայի հիման վրա բացել էր նորարար համագործակցության ռուս–հայկական կենտրոն, որը զբաղվում է Հայաստանի գիտական ինստիտուտների կողմից առաջարկվող նորարարական նախագծերի մոնիտորինգով` ռուսական կողմից ներդրողներ և շահագրգիռ գործընկերներ գրավելու համար», – պարզաբանեց Կալինինը։

Այս կապակցությամբ նա նաև նշեց, որ բիզնես ֆորումը ակտուալ է ռուսական ընկերությունների և Հայաստանում գործող ռուսական կապիտալով ընկերությունների համար, որոնք գործում են նորարարությունների հատվածում, ինչպես նաև Ռուսաստանի մարզերում գործող ընկերությունների համար։

Ինչպես նշեց «Սիտրոնիքս Հայաստան» ընկերության գլխավոր տնօրեն, Հայաստանում առաջին Ազատ տնտեսական գոտու կառավարիչ Արմեն Խաչատրյանը, ֆորումն առաջին հերթին թույլ կտա գրավել գործարարների, ինչը կնպաստի Հայաստանում նոր աշխատատեղերի ստեղծմանն ու շուկայում բարձր տեխնոլոգիաների ներդրմանը։

Ֆորումի տեղեկատվական հովանավորը telecom.arka.am հեռահաղորդակցական պորտալն է։–0–

Ծանոթացեք լուրերին առաջինն ու քննարկեք դրանք մեր Telegram-ում

15:43 22.11.2013