Հայաստանում մեկնարկային ներդրումներն ավելի թանկ են, քան Սիլիկոնային հովտում. Google

ԵՐԵՎԱՆ, 5 դեկտեմբերի. /ԱՌԿԱ/. Հայկական ընկերություններում արվող մեկնարկային ներդրումներն ավելի թանկ են, քան Սիլիկոնային հովտում, հինգշաբթի Երևանում անցկացվող Վենչուրային համաժողովի ընթացքում ասել է Google ընկերության նոր շուկաների ուսումնասիրման թիմի ներկայացուցիչ Դիվոն Լանը (Divon Lan)։

Նրա խոսքերով` Սիլիկոնային հովտում շատ ավելի հեշտ է բիզնես սկսել, քանի որ սկսնակ ընկերություններին տրամադրվում են լայն հնարավորություններ, այդ թվում նաև` անվճար տեխնիկա այն դեպքում, երբ Հայաստանում այդ տեխնիկան հարկավոր է ձեռք բերել։

«Կարծում եմ, որ այս համատեքստում հայկական startup–ների համար հիմնական լուծումը ամպային տեխնոլոգիաների կիրառումն է, որոնք թույլ են տալիս էականորեն կրճատել ընկերության ծախսերը», – ասել է Լանը։

Նրա կարծիքով` ծախսերի կրճատման մեկ այլ ուղղություն է ընկերությունների կլաստերային զարգացման հնարավորությունների ստեղծման անհրաժեշտությունը, ինչը թույլ կտա ոչ միայն զարգացնել տեղեկատվական տեխնոլոգիաների ոլորտը, այլև երկրում պահպանել մարդկային ռեսուրսներն ու մտավոր ներուժը։

Հայաստանում startup–ի զարգացման այլ խնդիրների թվում նա նշել է  մտածողությունը, մասնավորապես` զարգացած երկրներում startup–ի ստեղծումը հիմնվում է որպես ընկերության բաժնետերեր բոլոր աշխատակիցների մասնակցության սկզբունքի վրա, ինչը չի կիրառվում Հայաստանում։

Նա նաև նշել է, որ Հայաստանի աշխարհագրական դիրքը, գլոբալ շուկաներից երկրի հեռու լինելը տեխնոլոգիաների զարգացման ներկա պայմաններում այլևս խոչընդոտ չէ։

«Կարծում եմ, որ Android–ի համար հավելվածների օրինակի վրա երևում է, որ տեղեկատվական տեխնոլոգիաների ոլորտում կարևոր չէ իմանալ վերջնական սպառողին, դուրս է մղվում մարկետինգային վաճառքների ավանդական հասկացությունը, և քո գտնվելու վայրը այլևս դեր չունի ապրանքի առաջխաղացման գործում։ Այս ամենը շատ մեծ հնարավորություններ է բացում Հայաստանի համար», – ասել է Լանը։

Որպես նման առաջխաղացման օրինակ` նա նշել է բջջային սարքերի համար ծրագրային ապահովման հայկական արտադրող PicsArt ընկերությանը, որը համաշխարհային շուկայում ներկայացրել է իր ապրանքը` PicsArt Photo անվճար գրաֆիկական խմբագրական ծրագիրը, որը համաշխարհային ճանաչում է ստացել։–0–

Ծանոթացեք լուրերին առաջինն ու քննարկեք դրանք մեր Telegram-ում

15:21 05.12.2013