Նորաստեղծ տեխնոլոգիական ձեռնարկությունների ասոցիացիան միանում է UITE-ի՝ Հայաստանում ՏՏ և ՏՀՏ ոլորտի նախարարություն ստեղծելու պահանջին
ԵՐԵՎԱՆ, 22-ը մայիսի. /ԱՌԿԱ/. Նորաստեղծ տեխնոլոգիական ձեռնարկությունների ասոցիացիան (ՆՏՁԱ) միանում է Ինֆորմացիոն տեխնոլոգիաների ձեռնարկությունների միության (UITE) պահանջին՝ Հայաստանում տեղեկատվական, հեռահաղորդակցման տեխնոլոգիաների և ինովացիոն զարգացման նախարարություն ստեղծելու վերաբերյալ:
«Նախարարության առկայությունը կխթանի ոլորտի զարգացումը և հնարավորություն կտա խուսափել ոլորտի առաջընթացը խոչընդոտող բազմաթիվ հանգամանքներից»,- հաղորդագրությունում մեջբերվում է ՆՏՁԱ նախագահ Գևորգ Սաֆարյանի խոսքը:
Նրա խոսքերով՝ տնտեսական գործունեության առումով Հայաստանում նորաստեղծ ընկերությունները ոչ մի արտոնություն չունեն, մինչդեռ աշխարհի գրեթե բոլոր երկրներում սկսնակ ընկերությունների տեղակայման համար ձևավորում են հատուկ տնտեսական գոտիներ, նորաստեղծ ընկերությունները ստանում են աջակցություն ձևավորման և հետագա զարգացման համար, ունենում են ֆինանսավորման արտոնություններ:
Հաղորդագրությունում ասվում է, որ ՏՏ զարգացման հայեցակարգում նշված է, որ մինչև 2018 թ. պետք է ստեղծվի 1000 ձեռնարկություն: Այսօր գործում են մոտավորապես 350-ը, ինչը նշանակում է` հարկավոր է ևս 650 գործող կազմակերպություն:
«ՏՏ նախարարությունը և նրա` ՏՀՏ համայնքի վստահությունը վայելող ղեկավարները կդառնան ոլորտի հիմնական շարժիչ ուժերը, ի զորու կլինեն մշակել և իրականացնել ոլորտի զարգացմանն ուղղված նպատակային ծրագրերը»,- հավելեց Գևորգ Սաֆարյանը:
UITE-ն ավելի վաղ հանդես էր եկել Տեղեկատվական, հեռահաղորդակցման տեխնոլոգիաների և ինովացիոն ոլորտները կարգավորող առանձին պետական կառավարման մարմնի՝ նախարարության ստեղծման անհրաժեշտության վերաբերյալ հայտարարությամբ:
Ինֆորմացիոն Տեխնոլոգիաների Ձեռնարկությունների Միությունը հիմնադրվել է 2000թ` որպես Հայաստանում գործող տեղեկատվական և հեռահաղորդակցական տեխնոլոգիաների ոլորտի ձեռնարկությունների բիզնես ասոցիացիա: ԻՏՁՄ-ն ստեղծվել է ոլորտի ձեռնարկությունների շահերի պաշտպանության, բիզնեսի խթանման նպատակով:--0--
Ծանոթացեք լուրերին առաջինն ու քննարկեք դրանք մեր Telegram-ում
17:17 22.05.2012
