«BarCamp Yerevan-2014» վեցերորդ պաշտոնական կոնֆերանսը կանցնի Երևանում մայիսի 31–հունիսի 1–ը
ԵՐԵՎԱՆ, 16 մայիսի. /ԱՌԿԱ/. «BarCamp Yerevan-2014» վեցերորդ ոչ պաշտոնական կոնֆերանսը կանցնի Երևանում մայիսի 31–հունիսի 1–ը, ասվում է միջոցառման պաշտոնական կայքում։
Տեղեկատվական տեխնոլոգիաների ոլորտի ներկայացուցիչների` ծրագրավորողների, ինժեներների, բլոգերների, առցանց լրագրողների և սոցիալական ցանցերի ակտիվիստների կհավաքի թվով վեցերորդ «չկոնֆերանսը»։
Արդեն մեկնարկել է մասնակիցների գրանցումը, ովքեր կարող են ներկայացնել իրենց աշխատանքները։
Միջոցառման գլխավոր հովանավորը Ucom ընկերությունն է։ BarCamp–ին առանձին օժանդակություն է տրամադրում PicsArt ընկերությունը։
«ԲարՔեմփը» միջոցառումներ կազմակերպելու նոր ձևաչափ է: Առաջին անգամ այն անցկացվել է 2005թ. ԱՄՆ-ում՝ Սիլիկոնյան հովտում և հետագայում դարձել է ճանաչված ձևաչափ ամբողջ աշխարհում։ «ԲարՔեմփ» են անվանում տեղեկատվական տեխնոլոգիաների, ինտերնետի և նոր մեդիաների թեմաներով (չ)կոնֆերանսները, որոնք անցնում են ոչ ֆորմալ մթնոլորտում, ինչն ապահովում է բաց քննարկումներ և մտքերի ազատ փոխանակում։ Երևանում BarCamp «չկոնֆերանսն» անցկացվում է 2009-ից։
Առաջին BarCamp–ը նախկին միության տարածքում անցկացվել է 2007 թվականի հոկտեմբերին Կիևում։ Այն հավաքել էր ավելի քան 300 մասնակից Ուկրաինայից, Բելառուսից, Ղազախստանից, Լատվիայից, Ռուսաստանից, Ղրղզստանից, Լեհաստանից և տարածաշրջանի այլ երկրներից, անցկացվել է 45 շնորհանդես։
Կիևյան BarCamp–ից հետո անցկացվել է Բալթիքս BarCamp–ը Ռիգայում (2008 փետրվար) և Կովկաս BarCamp–ը Թբիլիսիում (2008 հունիս)։
Առաջին BarCamp Yerevan–ը կայացել է 2009 թվականի ապրիլի 17–19–ին, որը հավաքել է ՏՏ մասնագետների, ինտերնետ և տեխնոլոգիական ընկերությունների ներկայացուցիչների, ինտերնետ օգտագործողների, բլոգերների, նոր մեդիամասնագետների, լրագրողների և բոլոր հետաքրքրված անձանց և խմբերի, որոնք Համացանց են օգտագործում իրենց ամենօրյա աշխատանքում։ -0-
Ծանոթացեք լուրերին առաջինն ու քննարկեք դրանք մեր Telegram-ում
12:26 16.05.2014