Հայաստանում Mobile App Expo 2014 բջջային հավելվածների առաջին ցուցահանդեսը կկայանա մայիսի 30–ին

ԵՐԵՎԱՆ, 12 մայիսի. /ԱՌԿԱ/. Mobile App Expo 2014 բջջային հավելվածների առաջին ցուցահանդեսը կանցնի մայիսի 30–ին Երևանի Սիրահարների այգում, ասվում է mLab ECA բջջային հավելվածների տարածաշրջանային լաբորատորիայի հաղորդագրության մեջ։

Ցուցահանդեսին շուրջ 50 ընկերություններ կներկայանան «խելացի հեռախոսների և սարքերի» համար իրենց մշակած խաղերով, գործարար, կրթական, ժամանցային և սոցիալական ծրագրերով: Ցուցահանդեսին կներկայացվեն զանազան հավելվածներ, որոնց թվում` գրքեր հեռախոսում, ինտերակտիվ այբբենարան, նկարների ձևափոխում և կոլաժների պատրաստում մի քանի հպումով, տարադրամի լավագույն արժույթը բանկերում, կրթական և արկածային խաղեր։

«Այցելուները տաղավարներում կարող են փորձարկել և ծանոթանալ ոչ միայն հայաստանյան օգտագործողի համար մշակված հավելվածների հետ, այլև ամբողջ աշխարհում միլիոնավոր օգտագործողներ ունեցող «տեղական արտադրության» մոբայլ ծրագրերի հետ»,– նշվում է հաղորդագրության մեջ։

Այցելուների մուտքն ազատ է: Ցուցահանդեսի խաղերի գոտում նրանց սպասվում են հաճելի անակնկալներ և մրցանակներ:

Ցուցահանդեսի շրջանակում կկազմակերպվեն միջոցառումներ, այդ թվում` բաց դաս առաջին դասարանի աշակերտների համար, հայկական արտադրության շարժական համակարգիչների ՝ ԱրմԹաբերի օգնությամբ:
    
«Կկազմակերպվի նաև մոբայլ հավելվածների աքսելերացիայի ճամբար (Mobile App Acceleration Camp:MAAC). որի ընթացքում տարածաշրջանի սկսնակ ընկերությունները կաշխատեն փորձագետների հետ WindowsPhone հենքով նորարար հավելվածների գաղափարների վրա:  Լավագույնները  AppCampus ծրագրի կողմից կստանան ֆինանսավորում»,– ասվում է հաղորդագրության մեջ։
 
Մայիսի 31ին, սկսնակ ընկերությունները հնարավորություն կունենան ներկայացնելու իրենց գաղափարները Imperious Group ռուսական և  Granatus Ventures առաջին հայկական վենչուրային հիմնադրամներին:

Ինչպես ասվում է mLab–ի հաղորդագրության մեջ, միջոցառման նպատակը բջջային հավելվածների ոլորտի ներկայացուցիչների, այդ թվում` ծրագրավորողների, մարքեթոլոգների, բջջային օպերատորների, սարքավորումներ արտադրողների, ձեռնարկատերերի, ոլորտի մասնագետների միավորումն է, ինչպես նաև` Հայաստանում, Արևելյան Եվրոպայում, Հարավային Կովկասում և Կենտրոնական Ասիայում արտադրված բջջային հավելվածները ներկայացնելն է։

Ծրագրվում է, որ միջոցառմանը կմասնակցեն ավելի քան 800 այցելուներ և տեղեկատվական տեխնոլոգիաների ու բջջային հավելվածների ոլորտի մոտ 300 մասնագետներ։ Ցուցահանդեսի շրջանակում կանցկացվեն ինտերակտիվ սեմինարներ, շնորհանդեսներ, խաղարկային մրցույթներ։
 
Ցուցահանդեսի այցելուները կարող են բջջային հավելվածներ թեստավորել, ինտերակտիվ խաղեր խաղալ, մասնակցել սեմինարների և արժեքավոր մրցանակներ շահել։

Միջոցառման կազմակերպիչներն են «mLab ECA» մոբայլ լուծումների տարածաշրջանային լաբորատորիան, Ձեռնարկությունների ինկուբատոր հիմնադրամը, Մայքրոսոֆթ Ինովացիոն կենտրոնը և Պողոսյան Պարտեզները: -0-

Ծանոթացեք լուրերին առաջինն ու քննարկեք դրանք մեր Telegram-ում

17:52 12.05.2014