Google-ը Լոնդոնում start-up-երի համար նախատեսված կենտրոն է բացել
ԵՐԵՎԱՆ, 30 մարտի. /ԱՌԿԱ/. Google ինտերնետային ընկերությունը Լոնդոնում Campus London յոթհարկանի կենտրոն է բացել start-up թիմերի և նորարարություններ մշակողների համար, նշվում է ընկերության տեղեկատվության մեջ:
Campus London-ը գտնվում է Լոնդոնի Tech City շրջանում, որը կոչված է դառնալ ամերիկյան Սիլիկոնային հովտի նմանակը: Լոնդոնի արևելքում գտնվող Tech City տեխնոլոգիական կենտրոնի ստեղծման նախաձեռնությունը ներկայացրել է Մեծ Բրիտանիայի վարչապետ Դևիդ Քեմերոնը 2010 թ.-ի նոյեմբերին: Բացի Google-ից, նախագծին աջակցել են նաև Vodafone կապի օպերատորը, Facebook սոցցանցը, Intel-ը, որը զբաղվում է միկրոչիպերի արտադրությամբ և մի շարք այլ խոշոր ՏՀՏ ընկերություններ, հաղորդում է «ՌԻԱ Նովոստին»:
«Ինտերնետին բաժին է հասնում Մեծ Բրիտանիայի տնտեսության 8 տոկոսը: Մեր նպատակն է արագացնել start-up-երի էկոհամակարգի զարգացումն ու մեկ հարկի տակ հավաքել start-up-երի բրիտանական խոշորագույն միություններից մեկը», - գրում է Campus London-ի ղեկավար Էզե Վիդրան (Eze Vidra): Google ընկերության համար, որի լոնդոնյան գրասենյակը տեղակայված է երեք շենքերում, նման նախաձեռնությունն առաջինն է պատմության ընթացքում:
Հինգշաբթի բացված կենտրոնում կտեղակայվեն նաև Google-ի խորհրդատուներն ու այլ կազմակերպություններ, որոնք աջակցում են ինտերնետ-տեխնոլոգիայի ոլորտում գործող ձեռներեցներին: Campus London-ում մշակողները կարող են աշխատել իրենց նախագծերի վրա, ինչպես նաև մասնակցել ամենօրյա միջոցառումներին՝ շուկայի մասնակիցների դասախոսություններին, ծրագրավորմանը նվիրված վարպետության դասընթացներին, Google-ի աշխատակիցների կողմից կազմակերպվող թրեյնինգներին:-0-
Ծանոթացեք լուրերին առաջինն ու քննարկեք դրանք մեր Telegram-ում
13:41 30.03.2012