Գյումրու տեխնոլոգիական կենտրոնը կբացվի հունիսին. EIF տնօրեն
ԵՐԵՎԱՆ, 15 մայիսի. /ԱՌԿԱ/. Հայաստանին տնտեսության բոլոր ոլորտների զարգացման իրական հնարավորություն տվող նախագծեր մշակող Գյումրու տեխնոլոգիական կենտրոնը կբացվի հունիսին, հայտնեց «Ձեռնարկությունների ինկուբատոր» հիմնադրամի (EIF - Enterprise Incubator Foundation) տնօրեն Բագրատ Ենգիբարյանը։
Նրա խոսքով` Գյումրու տեխնոլոգիական կենտրոնը Հայաստանի համար աննախադեպ երևույթ է։ Այն պետք է ձեռնարկությունների մի ողջ համալիր դառնա։ Արդեն սկսել են գործել չորս լաբորատորիաներ, որոնք հեռանկարային այնպիսի ուղղություններ են զարգացնում, ինչպես էներգախնայողություն, էներգիայի այլընտրանքային աղբյուրներ, աղբի վերամշակում։
«Հսկայական աշխատանք է կատարվել սեղմ ժամկետներում։ Արդեն երկու արտասահմանյան ընկերություններ Գյումրիում աշխատելու ցանկություն են հայտնել»,– նշեց Ենգիբարյանը։
Միաժամանակ, հիմնադրամի տնօրենի կարծիքով, տեխնոպարկերի ստեղծման և զարգացման ծրագիրը գերակա նշանակություն ունի Հայաստանի համար, թեև տեխնոպարկերի ստեղծումը չպետք է ինքնանպատակ լինի։
Նա հայտնեց, որ տեխնոպարկերի ստեղծման նախագծերն արդեն սկսել են գործել Վանաձորում և Արցախում։
«Տեխնոպարկերը պետք է անհրաժեշտ միջավայրի ստեղծման նախադրյալներ ստեղծեն, որում կզարգանան ոչ միայն ՏՏ ոլորտի, այլ նաև, մասնավորապես, գյուղատնտեսության ոլորտի նորարարական տեխնոլոգիաներ։ Հենց այդ տեխնոլոգիաների օգտագործումը Հայաստանում կայուն տնտեսական աճ կապահովի»,– հավելեց Ենգիբարյանը։
«Ձեռնարկությունների ինկուբատոր» հիմնադրամը 2014 թվականի սկզբից Գյումրու տեխնոլոգիական կենտրոնի գործունեության պետական օժանդակության ծրագրի իրագործման գլխավոր օպերատորն է։
Գյումրիում տեխնոպարկի ստեղծման ծրագիրը ՀՀ կառավարության կողմից հաստատվել է դեռևս 2006 թ.-ի մարտի 2-ին: ՀՀ կառավարությունը 2009 թ.-ի ապրիլի 9-ին հավանություն է տվել Գյումրիում տեխնոպարկի գործունեության պետական աջակցության ծրագրին:
2012թ.–ի ապրիլի 29–ին մեկնարկել է տեխնոպարկի գլխավոր մասնաշենքի` Տեխնոլոգիական կենտրոնի շինարարությունը։ Գլխավոր մասնաշենքի շուրջ պետք է ձևավորվեն հեռահաղորդակցությունների և բարձր տեխնոլոգիաների ոլորտի ձեռնարկություններ։ Տեխնոպարկի ամբողջական գործարկումը նախատեսված էր իրականացնել երկու տարվա ընթացքում։
Տեխնոպարկ-ինկուբատորի գործունեության հիմնական ուղղությունները կապված են հետևյալ ոլորտների հետ՝ բարձր և տեղեկատվական տեխնոլոգիաներ, արվեստ, մոդելավորում, ոսկերչություն և զբոսաշրջություն։ Տեխնոպարկը հանդես կգա փոքր և միջին բիզնեսի ինկուբատորի դերում, որը կզբաղվի գիտատար արտադրությամբ, ինչը թույլ կտա ընդլայնել երկրի արտահանման հնարավորությունները: ($1 – 413,35 դրամ)։ -0-
Ծանոթացեք լուրերին առաջինն ու քննարկեք դրանք մեր Telegram-ում
16:35 15.05.2014