Գյումրու տեխնոլոգիական կենտրոնում ներդրումների ընդհանուր ծավալը հասել է գրեթե 15 մլն դոլարի. EIF տնօրեն
ԵՐԵՎԱՆ, 15 մայիսի. /ԱՌԿԱ/. Գյումրու տեխնոլոգիական կենտրոնում ներդրումների ընդհանուր ծավալը հասել է գրեթե 15 մլն դոլարի, հայտնեց «Ձեռնարկությունների ինկուբատոր» հիմնադրամի (EIF - Enterprise Incubator Foundation) տնօրեն Բագրատ Ենգիբարյանն «ԱՌԿԱ» գործակալությանը։
Նա միաժամանակ նշեց, որ 5 մլն դոլարը ներդրել է պետությունը, իսկ մնացած ներդրումները կազմել են մասնավոր հատվածի ներկայացուցիչների միջոցները։
«Ներդրումների ծավալը հիմնականում կախված է նրանից, թե որքանով ճիշտ կկազմվեն և կներկայացվեն ներդրումային ծրագրերը բիզնեսին և հասարակությանը»,– ասաց Ենգիբարյանը։
Ենգիբարյանը դժվարացավ հնչեցնել ապագայում ակնկալվող ներդրումների ծավալը, սակայն համոզմունք հայտնեց, որն խոսքը տասնյակ միլիոնավոր դոլարների մասին է, որոնք կներդրվեն Գյումրու ՏՏ ոլորտի, արդյունաբերության և տեքստիլի զարգացման մեջ։
«Իրականացված ներդրումների և կատարված աշխատանքի շնորհիվ բիզնես հատվածի հետաքրքրությունը նախագծի նկատմամբ աճել է։ Մասնավոր ընկերությունները սկսել են Գյումրիում անշարժ գույք ձեռք բերել»,– ասաց Ենգիբարյանը։
«Ձեռնարկությունների ինկուբատոր» հիմնադրամը 2014 թվականի սկզբից Գյումրու տեխնոլոգիական կենտրոնի գործունեության պետական օժանդակության ծրագրի իրագործման գլխավոր օպերատորն է։
Գյումրիում տեխնոպարկի ստեղծման ծրագիրը ՀՀ կառավարության կողմից հաստատվել է դեռևս 2006 թ.-ի մարտի 2-ին: ՀՀ կառավարությունը 2009 թ.-ի ապրիլի 9-ին հավանություն է տվել Գյումրիում տեխնոպարկի գործունեության պետական աջակցության ծրագրին:
2012թ.–ի ապրիլի 29–ին մեկնարկել է տեխնոպարկի գլխավոր մասնաշենքի` Տեխնոլոգիական կենտրոնի շինարարությունը։ Գլխավոր մասնաշենքի շուրջ պետք է ձևավորվեն հեռահաղորդակցությունների և բարձր տեխնոլոգիաների ոլորտի ձեռնարկություններ։ Տեխնոպարկի ամբողջական գործարկումը նախատեսված էր իրականացնել երկու տարվա ընթացքում։
Տեխնոպարկ-ինկուբատորի գործունեության հիմնական ուղղությունները կապված են հետևյալ ոլորտների հետ՝ բարձր և տեղեկատվական տեխնոլոգիաներ, արվեստ, մոդելավորում, ոսկերչություն և զբոսաշրջություն։ Տեխնոպարկը հանդես կգա փոքր և միջին բիզնեսի ինկուբատորի դերում, որը կզբաղվի գիտատար արտադրությամբ, ինչը թույլ կտա ընդլայնել երկրի արտահանման հնարավորությունները: ($1 – 413,35 դրամ)։ -0-
Ծանոթացեք լուրերին առաջինն ու քննարկեք դրանք մեր Telegram-ում
15:38 15.05.2014