Mobile App Expo 2014 բջջային հավելվածների առաջին ցուցահանդեսը կկայանա Հայաստանում մայիսի 30–ին
ԵՐԵՎԱՆ, 7 ապրիլի. /ԱՌԿԱ/. Հայաստանում Mobile App Expo 2014 բջջային հավելվածների առաջին ցուցահանդեսը կանցնի մայիսի 30–ին, ասվում է mLab ECA բջջային հավելվածների տարածաշրջանային լաբորատորիայի կայքում։
«Սա նոր ծրագրերի, ծառայությունների, տեխնոլոգիաների և սկսնակ ընկերությունների հետ ծանոթանալու լավագույն հնարավորությունն է։ Ցուցահանդեսին կմասնակցի մոտ 50 հայկական ընկերություն, որոնք կներկայացնեն իրենց մշակումներն ու լուծումները, խաղերը, հավելվածները, բիզնես–ծրագրերը` մշակված ինչպես տեղական, այնպես էլ արտասահմանյան շուկաների համար»,– ասվում է հաղորդագրության մեջ։
Ինչպես ասվում է mLab հաղորդագրության մեջ, միջոցառման նպատակը բջջային հավելվածների ոլորտի ներկայացուցիչներին, այդ թվում` ծրագրավորողներին, մարքեթոլոգների, բջջային օպերատորների, սարքավորումների արտադրողների, ձեռնարկատերերին, ոլորտի մասնագետներին միավորելն է և Հայաստանում, Արևելյան Եվրոպայում, Հարավային Կովկասում և Կենտրոնական Ասիայում մշակված բջջային հավելվածները ներկայացնելը։
Ծրագրվում է, որ միջոցառումը կունենա ավելի քան 800 այցելու և միջոցառմանը կմասնակցեն տեղեկատվական տեխնոլոգիաների ու բջջային հավելվածների ոլորտի մոտ 300 մասնագետներ։ Ցուցահանդեսի շրջանակում կանցկացվեն ինտերակտիվ սեմինարներ, շնորհանդեսներ, խաղային մրցույթներ։
Ցուցահանդեսի այցելուները կարող են թեստավորել բջջային հավելվածները, ինտերակտիվ խաղեր խաղալ, մասնակցել սեմինարների և արժեքավոր նվերներ ստանալ։
Ցուցահանդեսի շրջանակներում լավագույն Start-up–երն իրենց գաղափարները կներկայացնեն Imperious Group ուկրաինական վենչուրային հիմնադրամի դիտարկմանը։ -0-
Ծանոթացեք լուրերին առաջինն ու քննարկեք դրանք մեր Telegram-ում
18:10 07.04.2014