Հայաստանի բարձր տեխնոլոգիաների ոլորտը տարեկան աճում է 22-25%. նախագահ
ԵՐԵՎԱՆ, 27 սեպտեմբերի. /ԱՌԿԱ/. Բարձր տեխնոլոգիաների ոլորտը վերջին տարիներին զգալի առաջընթաց է ապրում Հայաստանում՝ արձանագրելով տարեկան միջինը 22-25 տոկոս աճ, ասել է ՀՀ նախագահ Սերժ Սարգսյանը Նյու Յորքում ArmTech 2014 բարձր տեխնոլոգիաների 7-րդ ամենամյա համաժողովի ժամանակ:
Նախագահի խոսքերով՝ վերջին տարիներին մեծանում են արտահանման և ներդրումների ծավալները, համապատասխանաբար ընդլայնվում է աշխարհագրությունը, արտահանումը կազմում է գրեթե 60 տոկոս:
«Ակտիվ գործող կազմակերպությունների թիվը գերազանցում է 380-ը, ինչի արդյունքում աշխատուժը տարեկան առնվազն 10 տոկոս աճ է արձանագրում: Այսօր այդ ոլորտում ներգրավված է շուրջ 11 հազար մասնագետ, ինչը Հայաստանի համար փոքր թիվ չէ», - ասել է Սարգսյանը:
Նա նաև նշել է զգալի առաջընթացը ոլորտի անդրազգային կազմակերպությունների ՝ Հայաստան մուտքի ուղղությամբ, որի վկայությունը նաև «ԱրմԹեք» համաժողովին միջազգային գործընկերների ներկայությունն է:
Նախագահն ընդգծեց, որ Հայաստանում տեղեկատվական տեխնոլոգիաների և գիտելիքահեն ոլորտների կայուն զարգացման համար պետությունը շարունակական աջակցության հանձնառություն է վերցրել: Այդ նպատակով 2009թ. հիմնվել է ՏՏ ոլորտում համաշխարհային ներդրման համար ՀՀ Նախագահի մրցանակը: Մրցանակն ամենամյա է և շնորհվում է ՏՏ ոլորտում բացառիկ ներդրում կատարած անձանց: Այս տարի այդ մրցանակը բաժին է հասել «Սիսկո» ընկերության զարգացման գծով նախագահ Մարիո Մացոլային:
2010 թ.-ից նախագահական մրցանակի են արժանացել համաշխարհային ՏՏ ոլորտի այնպիսի լեգենդներ, ինչպիսիք են՝ Apple-ի համահիմնադիր Սթիվ Վոզնյակը, Intel կորպորացիայի Տնօրենների խորհրդի նախկին նախագահ Քրեյգ Բարեթը, «Synaptics» ընկերության պատվավոր նախագահ Ֆեդերիկո Ֆաջին, Hitachi Electronic Devices Group ընկերության նախկին գործադիր տնօրեն Ցուգիո Մակիմոտոն (Tsugio Makimoto):
2000 թ.-ին ՀՀ կառավարությունը ՏՏ ոլորտը առաջնահերթ հայտարարեց երկրի տնտեսությունում: 2014 թ.-ի հունվարի 1-ի տվյալներով՝ Հայաստանում գրանցվել է ՏՏ ոլորտում գործող ավելի քան 380 ընկերություն, որոնցից 159-ը խոշոր օտարերկրյա ընկերությունների ներկայացուցչություններ են կամ գործում է օտարերկրյա կապիտալով:
Հայաստանում ՏՏ ոլորտն ամեն տարի ապահովում է մոտ 20-25 տոկոսի աճ: Հայաստանում ՀՆԱ-ում ՏՏ ոլորտի մասնաբաժինը կազմում է 3,8 տոկոս: 2013 թ.-ի արդյունքում՝ ոլորտի աճը կազմել է 22 տոկոս: Ոլորտի ամենամյա շրջանառությունը կազմում է 380 մլն դոլար: Բնագավառի զարգացման ռազմավարության համաձայն՝ 2018 թ.-ին նախատեսվում է ՏՏ ոլորտի 1 մլրդ դոլարի շրջանառություն ապահովել:-0-
Ծանոթացեք լուրերին առաջինն ու քննարկեք դրանք մեր Telegram-ում
17:32 27.09.2014