Հայկական երկու start-up-եր կպայքարեն 30-50 հազար դոլարի չափով ուկրաինական և էստոնական վենչուրային ներդրումներ ստանալու համար
ԵՐԵՎԱՆ, 13 նոյեմբերի. /ԱՌԿԱ/. SoloLearn շարժական կրթական հարթակը և SkyCriptor ամպային տվյալների կոդավորման կուծումը կպայքարեն 30-50 հազար դոլարի չափով ուկրաինական և էստոնական վենչուրային ներդրումներ ստանալու համար, հայտնեցին «Ձեռնարկությունների ինկուբատոր» հիմնադրամի մամուլի ծառայությունից: Հաղթող ընկերություններից երկուսը՝ SoloLearn եւ SkyCriptor, նաև հնարավորություն ունեն աջակցություն ստանալու ուկրաինական HappyFarm եւ էստոնական StartupWiseGuys աքսելերատորների կողմից: «Նրանք կմասնակցեն հարցազրույցի, որից հետո Մայքրոսոֆթ ինովացիոն կենտրոնի աջակցությամբ կմեկնեն Էստոնիա կամ Ուկրաինա՝ հանդիպելու ներդրումային կոմիտեի հետ և պայքարելու 30.000-50.000 դոլար ներդրում ստանալու համար», - նշվում է հաղորդագրության մեջ: SoloLearn շարժական կրթական հարթակը հոկտեմբերի սկզբին ճանաչվել էր Seedstars Yerevan 2014 մրցույթի ֆինալիստ և հնարավորություն էր ստացել մասնակցել 2015 թ.-ի փետրվարի 4-ին Ժնևում կայանալիք Seedstars մրցույթի միջազգային փուլին: Բացի այդ, Granatus Ventures հայկական վենչուրային ընկերությունը սեպտեմբերի վերջին SoloLearn-ի հետ համաձայնագիր է ստորագրել, ըստ որի՝ նախագծին կտրամադրի 100 հազար դոլար և ակսելերացիայի աջակցություն: SoloLearn–ը հիմնվել է 2013 թվականի հունիսին և 14 ինտերակտիվ ու խաղային հավելվածներ առաջարկող շարժական կրթական համակարգ է ծրագրավորման, բիզնեսի և լուսանկարչության ոլորտներում։ Հարթակը հասանելի է ինչպես Adnroid–ի, այնպես էլ Windows–ի համար, միաժամանակ հավելվածի բեռնումների թիվը գերազանցել է 350 հազարը։ SkyCriptor-ը ամպային տվյալների կոդավորման լուծում է, որը փաստաթղթեր է մշակում, կոդավորում և ապակոդավորում, ինչը թույլ է տալիս հաճախորդներին հուսալի կերպով օգտագործել ամպային ռեսուրսները: SkyCriptor-ից կարող են օգտվել կոդավորման մասին հատուկ գիտելիքներ և հմտություններ չունեցող մարդիկ: Այն հնարավորություն է տալիս կոդավորված տվյալների անվտանգ որոնում իրականացնել:-0-
Ծանոթացեք լուրերին առաջինն ու քննարկեք դրանք մեր Telegram-ում
13:05 13.11.2014