Nokia–ն մտադիր է 250 մլն դոլար ներդնել բջջային սթարթափերում

ԵՐԵՎԱՆ, 30 հունվարի. /ԱՌԿԱ/. Բջջային հեռախոսների երբեմնի խոշորագույն արտադրող Nokia ընկերությունը, որն այսօր անկում է ապրում մրցակցության պատճառով, ծրագրում է 250 միլիոն դոլար ներդնել բջջային տեխնոլոգիաների բնագավառի սթարթաթերում, հաղորդում է digit.ru–ն` հղում անելով ընկերության մամուլի ծառայությանը։

Ներդրումներ կիրականացվեն Nokia ընկերության Growth Partners վենչուրային հիմնադրամի շրջանակներում, որը մասնագիտանում է սթարթափերի ներդրումների վրա հաղորդակցային տեխնոլոգիաներում։ Ընկերությունը ներդրումային օբյեկտներ կփնտրի ԱՄՆ–ի, Եվրոպայի և Ասիայի տարածքում, ասվում է մամուլի ծառայության հաղորդագրության մեջ։

Nokia–ի դիրքը բջջային հեռախոսների շուկայում վատանում է վերջին մի քանի տարիների ընթացքում մրցակիցների, նախևառաջ, Apple ընկերության կողմից ուժեղացող ճնշման հետևանքով, որը մեծ մասսայականություն է վայելում iPhone–ի շնորհիվ, և Samsung ընկերության կողմից ավելացող ճնշման հետևանքով, որն Android համակարգով աշխատող սմարթֆոնների լայն շարք է արտադրում։

Նախորդ եռամսյակը Nokia–ն ավարտել է հասույթի հերթական կրճատմամբ, իսկ 2012 թվականին զուտ վնասը 2011 թվականի համեմատ աճել է 2.6 անգամ` մինչև 3.1 միլիարդ եվրո։

Ինչպես նշում են ընկերությունում, Nokia–ի Growth Partners վենչուրային ստորաբաժանումը մշտապես լավ ֆինանսական արդյունքներ է ցույց տալիս։ Ընկերությունն այդ արդյունքները չի ներկայացրել։ -0-

Ծանոթացեք լուրերին առաջինն ու քննարկեք դրանք մեր Telegram-ում

18:51 30.01.2013