Հայկական start-up-երը կարող են դրամաշնորհների հայտեր ներկայացնել STEP ծրագրի շրջանակում
ԵՐԵՎԱՆ, 30 հունիսի. /ԱՌԿԱ/. Հայկական սկսնակ ընկերությունները (startups) կարող են մինչև հուլիսի 28-ը «Գաղափարից դեպի բիզնես» դրամաշնորհների հայտեր ներկայացնել գիտության և տեխնոլոգիայի առևտրայնացման ծրագրի (STEP), շրջանակում, հաղորդվում է «Ձեռնարկությունների ինկուբատոր» հիմնադրամի կայքում:
Մրցույթին կարող են մասնակցել սկսնակ ընկերությունների թիմերը (startups), գիտնականները և տեխնոլոգիական ոլորտի ձեռներեցները: Մրցույթի նպատակն է խթանել խոստումնալից նոր տեխնոլոգիաների և սկսնակ ընկերությունների բացահայտումն ու զարգացումը Հայաստանում՝ հետևյալ ոլորտներում՝ ՏՀՏ, ճարտարագիտություն և բարձր տեխնոլոգիաներ, մաքուր տեխնոլոգիաներ, գյուղատնտեսություն:
Մրցույթին ներկայացվող ծրագրերը պետք է ուղղված լինեն նոր, առևտրային տեսանկյունից կենսունակ տեխնոլոգիական արտադրանքի, գործընթացի կամ ծառայության ստեղծմանը կամ հետագա զարգացմանը:
Մասնակցության հայտերը պետք է մինչև 2014թ. հուլիսի 28-ը ներկայացնել ՁԻՀ ([email protected] հասցեով), որտեղ կստուգվի դրանց համապատասխանությունը ներկայացված պայմաններին:
Այնուհետև վերջնական հայտերը էլեկտրոնային եղանակով ներկայացվում են CRDF Global-ին www.crdfglobal.org/fromideatomarket կայքէջում և ՁԻՀ` [email protected] էլ. փոստով մինչև 2014թ. օգոստոսի 8-ը:
Մրցույթի մանրամասն հայտարարությունը, ներառյալ հայտերի ներկայացման կարգը, և դիմումի ձևը (անգլերեն/հայերեն) կարելի է ներբեռնել «Ձեռնարկությունների ինկուբատոր» հիմնադրամի կայքից կամ ստանալ էլ.փոստով՝ համապատասխան նամակ ուղարկելով [email protected] հասցեով:
Մրցույթի կազմակերպիչն է ԱՄՆ Քաղաքացիական հետազոտությունների և զարգացման հիմնադրամը (CRDF Global) ՀՀ Էկոնոմիկայի նախարարության և Ձեռնարկությունների ինկուբատոր հիմնադրամի հետ համատեղ:
STEP ծրագիրն իրագործվում է 2006 թվականից «Ձեռնարկությունների ինկուբատոր» հիմնադրամի կողմից՝ ԱՄՆ-ի քաղաքացիական հետազոտությունների և զարգացման հիմնադրամի (CRDF Global) ու Հայաստանի էկոնոմիկայի նախարարության հետ համատեղ:
Ծրագրի նպատակն է հայ մասնագետների օժանդակությունը նորարարական արտադրանքի շուկայում ներկայանալու, նոր ձեռնարկությունների ստեղծման, գործող ընկերությունների հետ արդյունավետ համագործակցության հարցում: Ծրագրի շրջանակներում տրվում են դրամաշնորհներ, անցկացվում են կլաստերային սեմինարներ, բիզնես-դասընթացներ, տրամադրվում են իրավաբանական և հաշվապահական խորհրդատվություններ։–0–
Ծանոթացեք լուրերին առաջինն ու քննարկեք դրանք մեր Telegram-ում
14:19 30.06.2014