Տեղեկատվական տեխնոլոգիաների հայ մասնագետները Թեհրանում կներկայացնեն ոլորտի զարգացման հեռանկարները Հայաստանում
ԵՐԵՎԱՆ, 8 ապրիլի. /ԱՌԿԱ/. Տեղեկատվական տեխնոլոգիաների հայ մասնագետները Թեհրանում կներկայացնեն ոլորտի զարգացման հեռանկարները Հայաստանում հաղորդվում է Ինֆորմացիոն տեխնոլոգիական ձեռնարկությունների միության (UITE) կայքում։
Հանդիպումը կկայանա «Ճանաչիր Հայաստանը» (Imagine Armenia) խորագրով ֆորումի ժամանակ, որը կանցկացվի Թեհրանում ապրիլի 14-17-ը:
Միջոցառման շրջանակներում Հայաստանում հաստատված հայրենադարձները կխոսեն Հայաստանի հետ կապեր հաստատելու հնարավորությունների մասին, կներկայացնեն գործող պետական և ոչ պետական կրթական, ճանաչողական ու կամավորական ծրագրերը, կզրուցեն իրենց անձնական փորձառության մասին:
Հիմնական ծրագրից բացի, ԻՏՁՄ-ի ներկայացուցիչները կներկայացնեն Հայաստանում արագ զարգացող ՏՏ ոլորտի ձեռքբերումները, հեռանկարներն ու մասնագիտական հնարավորությունները:
Այցի շրջանակներում նախատեսված են հանդիպումներ համայնքի ղեկավար ներկայացուցիչների, երիտասարդական ու ուսանողական միությունների անդամների և ֆորումով հետաքրքրված գործարարների հետ:
«Ճանաչիր Հայաստանը» (Imagine Armenia) խորագիրը կրող ֆորումը կազմակերպել են Թեհրանում «Վերադարձ Հայաստան» հիմնադրամը Ինֆորմացիոն տեխնոլոգիական ձեռնարկությունների միության հետ համատեղ` սփյուռքի նախարարության աջակցությամբ: --0--
Ծանոթացեք լուրերին առաջինն ու քննարկեք դրանք մեր Telegram-ում
13:21 08.04.2014
