Twitter-ի փոխնախագահը դարձել է Թումո ստեղծարար տեխնոլոգիաների կենտրոնի խորհրդի անդամ
ԵՐԵՎԱՆ, 22 նոյեմբերի. /ԱՌԿԱ/. Twitter-ի ՏՏ ոլորտի փոխնախագահ Րաֆֆի Գրիգորյանը դարձել է Թումո ստեղծարար տեխնոլոգիաների կենտրոնի խորհրդի նոր անդամ, հաղորդվում է կենտրոնի կայքում։
Ըստ հաղորդագրության` Րաֆֆի Գրիգորյանը կկիսի իր փորձն ու կրթության հանդեպ եռանդը Թումոյի թիմի հետ: 2014 թ. գարնանը Րաֆֆի Գրիգորյանը Թումոյում կղեկավարի համակարգչային ծրագրավորման խորացված աշխատարանը՝ օգնելով ընդլայնել Թումոյի ծրագրավորման ոլորտի ուսումնական ծրագիրը:
Րաֆֆի Գրիգորյանր ղեկավարել է Twitter-ի ծառայությունների ինտեգրումը Apple-ի iOS բջջային համակարգին և օգնել է ստեղծել Թվիթերի Աշխարհագրական տեղադրության (Geolocation) ծրագիրը։ Նա Թվիթերում ղեկավարում է ավելի քան հինգ տարբեր խմբեր և պատասխանատու է սոցիալական ցանցի ծրագրային ապահովման ենթակառույցի համար:
Նախքան Թվիթերին միանալը, Գրիգորյանը համահիմնադրել է WattzOn.com-ը, որը Business Week ամսագիրն անվանել էր 2008 թ. լավագույն գաղափար: Նա եղել է Մասաչուսեթսի տեխնոլոգիական ինստիտուտի Մեդիա մասնիկներ ու ատոմներ խմբի անդամ, ինչպես նաև դասավանդել է Նյու Յորքի համալսարանի Ինտերակտիվ հեռահաղորդակցության բաժնում: Գրիգորյանը «O'Reilly Media» հրատարակչատան «TiVo Hacks» գրքի հեղինակն է և «MIT Media Bits and Atoms» խմբի նախկին անդամը։
«Թումո» կենտրոնը նախատեսված է 12–18 տարեկան երիտասարդներին ՏՏ անվճար ուսուցման համար։ Կենտրոնի նպատակն է ծանոթացնել հայ երիտասարդներին առաջատար տեխնոլոգիաների հետ և ուսուցանել նրանց, ինչպես նաև հնարավորություն ընձեռել նրանց հետաքրքրող ՏՏ ոլորտների խորացված ուսումնասիրման համար։–0–
Ծանոթացեք լուրերին առաջինն ու քննարկեք դրանք մեր Telegram-ում
16:00 22.11.2013