Հայկական ՏՏ արտադրանքի ՌԴ արտահանման ծավալը կազմում է ընդամենը 7%

ԵՐԵՎԱՆ, 2 ապրիլի. /ԱՌԿԱ/. Հայկական ՏՏ հատվածը մեծ չօգտագործված ներուժ ունի Ռուսաստանի հետ, հինգշաբթի լրագրողներին ասաց Ինֆորմացիոն տեխնոլոգիաների ձեռնարկությունների միության (UITE) գործադիր տնօրեն Կարեն Վարդանյանը։

Նրա խոսքերով` հայկական ՏՏ արտահանման ծավալում Ռուսաստանը կազմում է ընդամենը 7%-ը, այն դեպքում, որ ԱՄՆ շուկային բաժին է ընկնում հայկական ՏՏ արտադրանքի արտահանման 60%-ը։

«Հաշվի առնելով այն, որ մենք տիրապետում ենք այդ շուկայի լեզվին, մշակույթին, դա նշանակում է, որ մեր ռուսական շուկա մեր արտահանման ներուժը գործնականում չի օգտագործվում»,- ասաց Վարդանյանը, հայտնում է telecom.arka.am հեռահաղորդակցային պորտալը։

Նա ընդգծեց, որ կապերի զարգացման համար նախևառաջ անհրաժեշտ է երկկողմանի վստահելի հարաբերություններ հաստատել ընկերությունների միջև, որոնք հետագայում կարող են վերածվել կոնկրետ համատեղ ծրագրերի։

Նա միաժամանակ նշեց, որ եթե այսօր Հայաստանը ռուսական շուկա արտահանում է եռաչափ մոդելավորման, անիմացիայի, խաղերի և շարժական հավելվածների  ոլորտի ՏՏ արտադրանք, ապա ապագայում կոոպերացիայի հաստատման դեպքում այդ ուղղությունները կարող են մեծանալ և ներառել բարձր տեխնոլոգիաների ոլորտները։

Վարդանյանն ընդգծեց նաև, որ հայկական օրենսդրությունը սթարթափերի առումով բավականին ազատական է, կառավարությունը նախատեսել է էական արտոնություններ, ինչը կարող է առիթ դառնալ Հայաստանում համատեղ հայ-ռուսական start-up ընկերությունների գրանցման համար։

2000 թ.––ին ՀՀ կառավարությունը ՏՏ ոլորտը հայտարարեց հեռանկարային ոլորտ երկրի տնտեսության համար։ 2014 թ.–ի հունվարի 1–ի տվյալներով` Հայաստանում գրանցված է ՏՏ ոլորտում գործող ավելի քան 380 ընկերություն, որոնցից 159–ը օտարերկրյա կապիտալով են կամ օտարերկրյա խոշոր ընկերությունների ներկայացուցչություններ են։

Հայաստանի ՏՏ ոլորտն ամեն տարի ապահովում է մոտ 20–25 տոկոս աճ։ Հայաստանի ՀՆԱ–ում ՏՏ ոլորտի մասնաբաժինը կազմում է 3,8 տոկոս։ Ոլորտի զարգացման ռազմավարության համաձայն` 2018 թ.–ին նախատեսվում է ապահովել ՏՏ ոլորտի 1 մլրդ դոլարի շրջանառություն։

ՀՀ խորհրդարանը 2014թ. դեկտեմբերի 17–ին երրորդ և վերջին ընթերցմամբ ընդունեց «Տեղեկատվական տեխնոլոգիաների ոլորտի պետական աջակցության մասին» օրինագիծը և «Շահութահարկի մասին» և «Եկամտահարկի մասին» օրենքներում համապատասխան փոփոխությունների կատարումը։ Օրինագծով նախատեսվում է ստեղծել ՏՏ ոլորտում պետական օժանդակության` Հայաստանի համար նոր համակարգ։ Մասնավորապես, օրենսդրական փաթեթով ենթադրվում է բարենպաստ պայմաններ ստեղծել ոլորտում սկսնակ ընկերությունների (start-up) համար հարկային տեսանկյունից։ –0–

Ծանոթացեք լուրերին առաջինն ու քննարկեք դրանք մեր Telegram-ում

14:00 02.04.2015