Սմարթֆոնների մատակարարման ծավալը տարվա ընթացքում ավելացել է 7,7%–ով, առաջատարը Samsung–ն է

ԵՐԵՎԱՆ, 22 դեկտեմբերի. /ԱՌԿԱ/. Digitimes Research հետազոտական ընկերության զեկույցի համաձայն` այս տարվա երրորդ եռամսյակում սմարթֆոնների մատակարարման ծավալներն ավելացել են 7,7 տոկոսով` նախորդ տարվա նույն ժամանակահատվածի համեմատ, հաղորդում է PlayStoreApps–ը։

Հուլիսից սեպտեմբեր ընկած ժամանակահատվածում մատակարարվել է մոտ 331,9 մլն սմարթֆոն, ինչը 10,5 տոկոսով ավել է այս տարվա երկրորդ եռամսյակի ցուցանիշներից։ Ընթացիկ եռամսյակում Digitimes Research–ն ակնկալում է, որ մատակարարման ծավալները կավելանան` հասնելով 396,8 մլն միավորի։ Եթե կանխատեսումն իրականանա, ապա ողջ տարվա ընթացքում կմատակարարվի 1,326 մլրդ սմարթֆոն։

Երրորդ եռամսյակի արդյունքում, Samsung–ն ու Apple–ը զբաղեցնում են շուկայի առաջատարի դիրքերը։ Նշված ժամանակահատվածում Samsung–ը մատակարարել է աշխարհում բոլոր սմարթֆոնների 25,6 տոկոսը, իսկ Apple–ը` 14,5 տոկոսը։ 7,4 տոկոս ցուցանիշով երրորդ հորիզոնականում Huawei–ն է, այնուհետև գալիս են Lenovo–ն (4,8 տոկոս) և LG–ն (4,5 տոկոս)։

Xiaomi–ի մատակարարման ծավալը կազմել է այս տարվա երրորդ եռամսյակում մատարարված սմարթֆոնների ընդհանուր թվի ընդամենը 3,8 տոկոսը։ Xiaomi–ին հետևում են BBK–ը (3,5%), TCL–ը (3,3%), Oppo–ն (3,2%), ZTE–ն (2,5%) և Sony–ն (2%)։ Microsoft–ը 1,7 տոկոսով զբաղեցնում է 12–րդ հորիզոնականը։ Լավագույն–15–ը  եզրափակում են Meizu–ն (1,7%) Coolpad–ը (1,5%) և ASUS–ը (1,4%)։ –0-

Ծանոթացեք լուրերին առաջինն ու քննարկեք դրանք մեր Telegram-ում

13:59 22.12.2015