30 տարի բեմում. Վիվա-ՄՏՍ-ի և «Փարոս» կամերային երգչախմբի գործընկերությունը շարունակվում է

ԵՐԵՎԱՆ, 6 նոյեմբերի․/ԱՌԿԱ/․ Կայացել է միջազգային մրցույթների դափնեկիր, «Փարոս» կամերային երգչախմբի հոբելյանական համերգը: Իր տեսակի մեջ եզակի երգչախումբը ներառական է. երգիչներից շատերը սայլակավոր են կամ այլ տեսակի հաշմանդամություն ունեն, հաղորդում է Վիվա–ՄՏՍ ընկերության մամուլի ծառայությունը:

Ստեղծագործական կայացման երկար ուղի անցած երգչախումբը ստեղծվել է երեսուն տարի առաջ՝ սայլակի օգնությամբ տեղաշարժվող մարդկանց հոգեբանական ռեաբիլիտացիան  ապահովելու համար:

Արդեն այսօր  «Ունիսոն» ՀԿ-ին կից գործող «Փարոս»-ը երկրում մեծ ճանաչում ունի: Երեք տասնամյակի ընթացքում «Փարոս»-ը կամերային երաժշտությունը լավագույն կերպով է ներկայացրել Հայաստանի և արտերկրի մեծ բեմերում (Լիբանան, Վրաստան, Մեծ Բրիտանիա, Իտալիա, Վատիկան, Ֆրանսիա, Ավստրիա, Սլովակիա, Լատվիա, Ռուսաստան)՝ դրսևորելով բարձր պրոֆեսիանոլիզմ և խնդիրները երաժշտությամբ հաղթահարելու կամքի ուժ: «Փարոս»-ն իր օրինակով լիարժեք ապրելու և ստեղծագործելու պատգամ է հղում հաշմանդամություն ունեցող անձանց. արվեստը ոչ միայն ինքնադրսևորվելու հնարավորություն է, այլև ապրեցնելու ուժ  ունի:

«Մեր ստեղծագործական նվաճումները անհնար կլինեին առանց աջակիցների։ Դրա վառ ապացույցն է 2011թ.-ին Բրատիսլավայում կայացած «Musica Sacra» միջազգային մրցույթում «Փարոս»-ի հաղթանակը, որն արձանագրվեց, երբ երգչախմբի գլխավոր գործընկերոջ դերը ստանձնեց Վիվա-ՄՏՍ-ը։ Այդ հաջողությանը հաջորդեցին Երգչախմբերի համաշխարհային խաղերին «Փարոս»-ի նվաճած արծաթե 4 մեդալները (2014 և 2016թթ.) և հետագա բազմաթիվ պատասխանատու ելույթներն ու հյուրախաղերը», - ասել է «Ունիսոն» ՀԿ-ի և «Փարոս» կամերային երգչախմբի տնօրեն Արմեն Ալավերդյանը։

«Փարոս»-ի հոբելյանական համերգի կայացմանն աջակցել են ՀՀ կրթության, գիտության, մշակույթի և սպորտի նախարարությունը և Երևանի քաղաքապետարանը: Խումբը կատարել է Կոմիտա­սի, Մ. Եկմալյանի, Հ. Օդաբաշյանի, Գ. Օրբանի և այլ հեղինակների ստեղծագործություններից, հնչել է նաև Կ. Ափրիկյանի «Սասունցի Դավթի ծնունդը» օրատորիայի ֆինալը։ Համերգին մասնակցել են օպերայի սիմֆոնիկ նվագախումբը, «Գեղարդ» երգեցիկ խումբը, Ա. Տիգրանյանի անվան երաժշտական դպրոցի երգչախումբը, «Արևային զանգակները», Արցախի պետական երգչախումբը և Արցախի «Մռակած» պետական կամերային երգչախումբը։

«Փարոս»-ի հոբելյանական համերգը կազմակերպվել է Արցախից բռնի տեղահանված, հաշմանդա­մություն ունեցող մեր հայրենակիցներին աջակցելու համար:

«Փարոս» կամերային երգչախումբը հիմնադրվել է 1993 թ.-ին: 2002թ.-ից «Փարոսը» գործում է հաշմանդա­մություն ունեցող անձանց իրավունքների պաշտպանությամբ զբաղվող «Ունիսոն» ՀԿ-ին կից: 2011 թվականից «Փարոս» կամերային երգչախմբի Գլխավոր գործընկերն է Վիվա-ՄՏՍ-ը։ Երգչախմբին մշտական աջակցություն են ցուցաբերում «Փարոս» հիմնադրամը, Քուլհանջյան - Շտրաուխ ընտանիքը (ԱՄՆ) և Հայկական Կարմիր Խաչի «Գրացիա» միջազգային հետվնասվածքային վերականգնողական կենտրոնը: Լրացուցիչ տեղեկությունների համար դիմել «Ունիսոն» ՀԿ-ի և «Փարոս» կամերային երգչախմբի տնօրեն Արմեն Ալավերդյանին 077 77 42 77 հեռախոսահամարով կամ [email protected] էլեկտրոնային փոստով։-0-

Ծանոթացեք լուրերին առաջինն ու քննարկեք դրանք մեր Telegram-ում

16:14 06.11.2023