Հայաստանում Տեղեկատվական տեխնոլոգիաների համաշխարհային կոնգրեսի անցկացումը կբարձրացնի երկրի վարկանիշը. էկոնոմիկայի նախարար
ԵՐԵՎԱՆ, 9 մարտի. /ԱՌԿԱ/. 2019 թ.–ին Հայաստանում Տեղեկատվական տեխնոլոգիաների համաշխարհային կոնգրեսի (WCIT) անցկացումը կբարձրանի երկրի համաշխարհային վարկանիշը ՏՏ ոլորտում, երկուշաբթի ասաց էկոնոմիկայի նախարար Կարեն Ճշմարիտյանը Երևանում կոնգրեսի անցկացման մասին համաձայնագրի ստորագրումից հետո։
Փաստաթուղթը ստորագրել են ՏՏ ասոցիացիաների համաշխարհային դաշինքի գլխավոր քարտուղար (WITSA) Ջիմ Փոյզանթը (Jim Poisant), Տեղեկատվական տեխնոլոգիաների ձեռնարկությունների միության գլխավոր տնօրեն (UITE) Կարեն Վարդանյանն ու «UITE Էքսպո» ընկերության տնօրեն Հայկ Չոբանյանը։
«Այսօրվանից պետք է պատրաստվել Կոնգրեսի անցկացմանը։ Դրա համար համապատասխան կազմակերպություններն այսօր համաձայնագիր են ստորագրել։ Սա կազմակերպչական աշխատանքի սկիզբ է», – ասաց Ճշմարիտյանը։
Նրա խոսքերով` UITE–ն Հայաստանում այն քիչ կազմակերպություններից է, որոնք ՏՏ ոլորտում երկիրը ներկայացնում են միջազգային ասպարեզում։
«Կարծում եմ, որ այս նախաձեռնությունը այն հիմնաքարերից է, որոնք ապագայում կբարձրացնեն Հայաստանի վարկանիշը», – նշեց Ճշմարիտյանը։
Կարեն Վարդանյանն իր հերթին ընդգծեց, որ Կոնգրեսը բավականին խոշոր միջոցառում է, որին մասնակցում է մոտ 2,5 հազար պատվիրակ աշխարհի 80 երկրներից։ Կոնգրեսի շրջանակում անցկացվում է նաև հատուկ ցուցահանդես, որի ժամանակ ներկայացվում են ամենաառաջատար լուծումները։
«Կոնգրեսի անցկացումը մեզ համար մեծ պատիվ է, բայց նաև պատասխանատվություն։ Հույս ունենք, որ այն Հայաստանում տեղեկատվական տեխնոլոգիաների զարգացմանը նոր ազդակ կհաղորդի», – նշեց Վարդանյանը։
Ջիմ Փոյզանթի խոսքերով` սպասվում է, որ Երևանում նախատեսված Կոնգրեսի կմասնակցեն առնվազն 60 երկրների ներկայացուցիչներ։
«Կոնգրեսի պատվիրակները կներկայացնեն տեղեկատվական տեխնոլոգիաների ամենաառաջնային համաշխարհային ձեռքբերումները։ Ինչ վերաբերում է Հայաստանի ընտրությանը, ապա այն պայմանավորված էր նրանով, թե ինչ լուրջ ուշադրություն է հատկացվում երկրում ՏՏ ոլորտի զարգացման հարցին», – ասաց Փոյզանթը։
WCIT 2019–ը Երևանում անցկացնելու որոշումն ընդունվել է WCIT-14–ի ժամանակ, որն անցկացվել է սեպտեմբերի 29–ից հոկտեմբերի 1–ը Մեխիկոյում։
Որպես համաշխարհային ՏՏ ինդուստրիայի ներկայացուցիչ` ՏՏ ասոցիացիաների համաշխարհային դաշինքի նպատակն է լուծել տեղեկատվական տեխնոլոգիաների զարգացման խնդիրը, վերացնել խոչընդոտները նոր ՏՏ ապրանքներում և ծառայություններում ներդրումների ճանապարհին, ուժեղացնել դաշինքում ներառված ասոցիացիաների հնարավորությունները տեղեկատվության, առաջատար գիտելիքների և փորձի տարածման միջոցով, ասոցիացիայի անդամներին տրամադրել լայն հնարավորություններ ողջ աշխարհում կապեր հաստատելու համար։
Բացի այդ, ՏՏ ասոցիացիաների համաշխարհային դաշինքը երկու տարին մեկ անգամ կազմակերպում է Գագաթնաժողովներ (Տեղեկատվական տեխնոլոգիաների համաշխարհային կոնգրես և ՏՏ–ի հարցում հասարակական դիրքորոշման ձևավորման գլոբալ գագաթնաժողով)։
Հայաստանի ինֆորմացիոն տեխնոլոգիաների ձեռնարկությունների միությունը հիմնադրվել է 2000 թ.–ին ՏՏ ոլորտի ընկերությունների տնտեսական շահերը պաշտպանելու, բիզնեսի զարգացումը խթանելու, ՏՏ ոլորտի ուսումնասիրությունները խրախուսելու նպատակով։–0–
Ծանոթացեք լուրերին առաջինն ու քննարկեք դրանք մեր Telegram-ում
17:28 09.03.2015