Beeline-ի վաճառքի և սպասարկման նոր գրասենյակ է բացվել Կենտրոն համայնքում

ԵՐԵՎԱՆ, 5 հոկտեմբերի. /ԱՌԿԱ/. «ԱրմենՏել» ՓԲԸ–ն (ապրանքանիշը` Beeline) վաճառքի և սպասարկման գրասենյակ է բացել Կենտրոն համայնքում։

Ինչպես հայտնում են ընկերության մամուլի ծառայությունից, նոր գրասենյակը կսկսի գործել հոկտեմբերի 5-ից Խորենացի 26 հասցեում։

Գրասենյակը բաց է լինելու ամեն օր ժամը 10։00-ից մինչև 19։00 առանց ընդմիջումների։

«Մեր գերնպատակն է մշտական զարգացումը, ինչը ենթադրում է թե՛ ծառայությունների տեսակների ու քանակի ավելացում, թե՛ վաճառքի և սպասարկման գրասենյակների ցանցի ընդլայնում։ Յուրաքանչյուր նոր վաճառքի և սպասարկման գրասենյակ ավելի հասանելի է դարձնում մեր պարզ և հարմար ծառայությունները բաժանորդներին։ Դրանց շնորհիվ նրանք կարող են հնարավորինս արագ դիմել մեր մասնագետներին ցանկացած հարցով», - ասել է Հայաստանում Beeline-ի գլխավոր տնօրեն Անդրեյ Պյատախինը:

Beeline-ի կոմերցիոն տնօրեն Հայկ Կարապետյանն իր հերթին ասաց.  «Անկասկած, մեր ամեն բաժանորդ իրավունք ունի արագ և որակյալ սպասարկում ստանալու, և հենց այդ պատճառով մենք չենք դադարեցնում նոր սպասարկման գրասենյակներ բացել Երևանում ու այլ մարզերում։ Միայն այս ամսվա ընթացքում սկսում են գործել երկու նոր գրասենյակներ։ Բնականաբար, դրանով մենք չենք սահմանափակվելու և միշտ քայլելու ենք ընդառաջ մեր հաճախորդներին»։

Այսօրվա դրությամբ Հայաստանի տարածքում գործում է 77 սեփական և դիլերական վաճառքի և սպասարկման գրասենյակ: 

«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ: –0–

Ծանոթացեք լուրերին առաջինն ու քննարկեք դրանք մեր Telegram-ում

16:45 05.10.2017