Շուրջ 130-140 ճարտարագիտական լաբորատորիաներ կստեղծվեն ՀՀ դպրոցներում 2016 թ.–ին
ԵՐԵՎԱՆ, 27 հունվարի. /ԱՌԿԱ/. Շուրջ 130-140 ճարտարագիտական լաբորատորիաներ է ծրագրվում ստեղծել Հայաստանի դպրոցներում 2016 թվականին, չորեքշաբթի լրագրողներին ասաց UITE գործադիր տնօրեն Կարեն Վարդանյանը։
«UITE–ն այդ հարցում գործակցում է Հայաստանի կառավարության հետ։ Ենթադրվում է, որ UITE–ը կստեղծի 80 լաբորատորիաներ, մնացածը` կառավարությունը։ Տարեվերջին կամփոփվեն արդյունքները, որոնց հիման վրա մենք հանդես կգանք այդ նախագծի համար պետբյուջեից միջոցներ հատկացնելու առաջարկություններով»,– ասաց Վարդանյանը։Նա նշեց, որ ներկայում Հայաստանի դպրոցներում գործում է արդեն շուրջ 90 ճարտարագիտական լաբորատորիաներ։ Դրանց ստեղծման կարևորությունը պայմանավորված է Հայաստանի ՏՏ կրթության ոլորտում առկա խնդիրներով։ Ծրագրվում է, որ մինչև 2016 թվականը ճարտարագիտական լաբորատորիաներ կգործեն Հայաստանի բոլոր դպրոցներում։
«Հայաստանի բուհերն այսօր չեն լուծում ՏՏ ոլորտի կադրային խնդիրները, քանի որ շրջանավարտների միայն 25-30 տոկոսը կարող է պրակտիկ աշխատանք սկսել։ Գիտակցելով խնդիրը` մենք հասկացանք, որ դրա լուծման համար անհրաժեշտ են կրթական նոր մոտեցումներ, ընդ որում` սկսած դպրոցից»,– ասաց Վարդանյանը։
Ինչ վերաբերում է բուհական կրթությանը, ապա, ըստ նրա, համալսարանները պետք է դառնան ՏՏ ընկերությունների հետ սերտ գործակցող գիտակրթական կենտրոններ։ Լաբորատորիաների ստեղծումը թույլ կտա դպրոցականներին ձեռք բերել ժամանակակից հմտություններ, ինչպես նաև կնպաստի տեխնոլոգիական մտածողության զարգացմանը և կօգնի հետագա մասնագիտական կողմնորոշման հարցում։
Ժամանակակից լաբորատորիաներում դպրոցականները կսովորեն զանազան սարքեր պատրաստել` հեռակառավարվող մեքենաներից մինչև կենցաղային ռոբոտներ։ Նրանք կկարողանան ծրագրավորում, եռաչափ մոդելների նախագծում, էլեկտրոնիկա, մեխանիկա սովորել։
Հայաստանի ինֆորմացիոն տեխնոլոցիաների ձեռնարկությունների միությունը(UITE) հիմնվել է 2000 թվականին տվյալ ճյուղի ընկերությունների տնտեսական շահերի պաշտպանության, բիզնեսի զարգացումը խթանելու, ՏՏ ոլորտի հետազոտությունները խրախուսելու նպատակով։ Միության կազմում են Հայաստանի բարձր և տեղեկատվական ոլորտը ներկայացնող տասնյակ ընկերություններ։ -0-
Ծանոթացեք լուրերին առաջինն ու քննարկեք դրանք մեր Telegram-ում
17:42 27.01.2016